9 مئی ورگے حالات بنے تاں فیصلہ کن طاقت نال نپٹیا جاوے گا: کور کمانڈرز کانفرنس
پاکستان لئی داخلی استحکام انتہائی اہم، کسے وی جواز اُتے پُرتشدد انتشار دی کسے وی کوشش نوں بلاامتیاز طاقت تے قانون دے ذریعے روکاں گے، افغانستان وچ دہشتگردی خلاف ٹارگٹڈ کارروائیاں دفاعی حق، پولیس دی استعدادِ کار ودھائی جاوے، شرکا کانفرنس دا سعودی عرب خلاف حوثی حملیاں اُتے اظہارِ برہمی، قوم دی حمایت نال افواج ملکی خودمختاری تے سلامتی دے تحفظ لئی مکمل طور اُتے تیار: فیلڈ مارشل عاصم منیر
راولپنڈی چیف آف آرمی سٹاف تے چیف آف ڈیفنس فورسز فیلڈ مارشل سید عاصم منیر دی زیرِ صدارت کور کمانڈرز کانفرنس وچ واضح کیتا گیا کہ 9 مئی ورگے حالات پیدا کرن دی کوشش نال بلاامتیاز تے فیصلہ کن طاقت دے نال نمٹیا جاوے گا۔
پاک فوج دے محکمہ تعلقاتِ عامہ (آئی ایس پی آر) دے مطابق 277ویں کور کمانڈرز کانفرنس جی ایچ کیو وچ منعقد ہوئی۔ کانفرنس دے آغاز وچ مسلح افواج، قانون نافذ کرن والے اداریاں تے مادرِ وطن دے دفاع وچ جاناں دا نذرانہ پیش کرن والے شہیداں تے معصوم شہریاں لئی فاتحہ خوانی کیتی گئی، جدوں کہ شرکا نے شہیداں دیاں بے مثال قربانیاں نوں زبردست خراجِ عقیدت پیش کیتا۔
کور کمانڈرز کانفرنس دے شرکا نے قرار دتا کہ افغانستان توں ہون والی دہشتگردی خلاف ٹارگٹڈ کارروائیاں پاکستان دا دفاعی حق نیں۔ فورم دے مطابق ہندوستان دے آلۂ کار دے طور اُتے دہشتگردی دے سنگین نتائج دی ذمہ دار صرف طالبان دی قیادت اے۔
فورم نے قانون نافذ کرن والے اداریاں ولوں انٹیلی جنس دی بنیاد اُتے جاری کامیاب انسدادِ دہشتگردی کارروائیاں نوں سراہیا تے آکھیا کہ دہشتگردی دے خاتمے لئی زمینی کارروائیاں دے نال مؤثر انتظامی تے گورننس اقدامات وی ناگزیر نیں۔
کور کمانڈرز کانفرنس وچ آکھیا گیا کہ گورننس نوں بنیادی سطح اُتے عوام دے نیڑے لیانا ضروری اے، جدوں کہ عوام نال دہشتگردی دیاں وجوہات تے عوامل اُتے مؤثر رابطہ کاری تے بیانیے اُتے وی کم کیتا جاوے۔
فورم نے دہشتگردی دے خاتمے لئی مخصوص عناصر دے زیرِ سایہ چلن والے کرائم، ٹیرر گٹھ جوڑ نوں توڑن تے پولیس دی استعدادِ کار ودھاؤن اُتے وی زور دتا۔
کانفرنس دے شرکا نے واضح کیتا کہ پاکستان لئی داخلی استحکام انتہائی اہم اے۔ کسے وی جواز اُتے پُرتشدد انتشار یا 9 مئی ورگے حالات پیدا کرن دی کسے وی کوشش نوں فیصلہ کن طاقت تے قانون دے ذریعے بلاامتیاز تے بلا جھجھک نمٹیا جاوے گا۔
کور کمانڈرز کانفرنس نے پاکستان، سعودی عرب تے ترکیہ دے درمیان طے پاؤن والے مکہ مشترکہ دفاعی معاہدے دا بھرپور خیرمقدم کردیاں اینوں دیرینہ سٹراٹیجک تعلقات تے مشترکہ دفاعی تعاون دے فروغ وچ اہم پیش رفت قرار دتا۔
فورم نے سعودی عرب خلاف حوثی حملیاں دی شدید الفاظ وچ مذمت تے اظہارِ برہمی کیتا، جدوں کہ سعودی عرب نال اظہارِ یکجہتی تے حرمین شریفین دے تحفظ تے تقدس لئی پاکستان دے عزم دا بھرپور اعادہ کیتا۔
کانفرنس وچ مسئلہ کشمیر نوں اقوامِ متحدہ دی سلامتی کونسل دیاں قرارداداں تے کشمیری عوام دیاں امنگاں دے مطابق حل کرن دے عزم دا وی اعادہ کیتا گیا۔
فیلڈ مارشل سید عاصم منیر نے ہدایت کیتی کہ انٹیلی جنس بیسڈ آپریشنز نوں ہور مضبوط بناؤن دا عمل جاری رکھیا جاوے۔ انہاں نے فارمیشنز اُتے زور دتا کہ جدید ٹیکنالوجی دے حصول، تربیت تے تمام جنگی جہتاں دے انضمام دے ذریعے دفاعی صلاحیتاں وچ مسلسل اضافہ کیتا جاوے۔
فیلڈ مارشل سید عاصم منیر نے آکھیا کہ قوم دی غیر متزلزل حمایت نال مسلح افواج پاکستان دی خودمختاری، علاقائی سالمیت تے قومی سلامتی دے تحفظ لئی مکمل طور اُتے تیار نیں۔
