6 توں ودھ ملک مکہ دفاعی معاہدے وچ شامل ہونا چاہندے نیں: اسحاق ڈار
افغانستان نوں دکھانا ہووے گا کہ انہاں نے ٹی ٹی پی، بی ایل اے تے فتنہ الہندوستان خلاف کارروائی کیتی اے، بحری راستے عالمی معیشت دی شہ رگ، ہر صورت کھلے رہنے چاہیدے نیں: نائب وزیراعظم دی پریس کانفرنس
اسلام آباد نائب وزیراعظم تے وزیر خارجہ اسحاق ڈار نے آکھیا اے کہ 6 توں ودھ ملک مکہ دفاعی معاہدے وچ شامل ہونا چاہندے نیں۔ افغانستان نوں دکھانا ہووے گا کہ اوہنے ٹی ٹی پی، بی ایل اے تے فتنہ الہندوستان خلاف کارروائی کیتی اے۔ اہم بحری راستے عالمی معیشت دی شہ رگ نیں تے انہاں نوں ہر صورت کھلا رہنا چاہیدا اے۔
اسلام آباد وچ پریس کانفرنس کردیاں اسحاق ڈار نے آکھیا کہ وزیراعظم شہباز شریف دا اقوامِ متحدہ دی جنرل اسمبلی دے اجلاس دے موقع اُتے نیویارک دا دورہ کامیاب رہیا۔ وزیراعظم نے عالمی رہنماواں دے سامنے پاکستان دا مؤقف مدلل انداز وچ پیش کیتا تے کشمیر، فلسطین، سندھ طاس معاہدے دیاں بھارتی خلاف ورزیاں، بھارت نال جنگ تے ایران امریکا کشیدگی سمیت اہم عالمی تے علاقائی معاملےآں اُتے گل کیتی۔
نائب وزیراعظم نے آکھیا کہ وزیراعظم نے آبنائے ہرمز تے باب المندب سمیت اہم بحری راستیاں بارے پاکستان دا واضح مؤقف پیش کیتا۔ پاکستان نے ایران تے امریکا وچکار کشیدگی ختم کرن لئی اپنی ثالثی دیاں کوششاں توں وی عالمی برادری نوں آگاہ کیتا۔
وزیراعظم نے مختلف ملکاں دے سربراہاں نال ملاقاتاں وچ دوطرفہ تعلقات، معاشی تعاون تے باہمی دلچسپی دے معاملےآں اُتے تبادلۂ خیال کیتا۔
اسحاق ڈار نے آکھیا کہ 47 سال بعد امریکا تے ایران دے اعلیٰ سطح دے مذاکرات اسلام آباد وچ ہوئے، جیہڑے پاکستان دیاں سفارتی کوششاں دی اہم پیش رفت نیں۔ اقوامِ متحدہ دے سیکرٹری جنرل پاکستان دے وڈے حمایتی نیں، انہاں نوں پاکستان دے دورے دی دعوت وی دِتی گئی اے۔
وزیراعظم نے بل گیٹس، پرنس رحیم آغا خان تے آئی ایم ایف دی منیجنگ ڈائریکٹر کرسٹالینا جارجیوا نال وی ملاقاتاں کیتیاں۔
افغانستان دے حوالے نال نائب وزیراعظم نے آکھیا کہ پاکستان کابل کولوں صرف ایہ مطالبہ کردا اے کہ اپنی سرزمین پاکستان خلاف استعمال نہ ہون دیوے۔ افغانستان نوں ثبوت دینا ہووے گا کہ اوہنے ٹی ٹی پی، بی ایل اے تے فتنہ الہندوستان خلاف کارروائی کیتی اے۔
دریں اثنا اسحاق ڈار نے سوشل میڈیا پلیٹ فارم ایکس اُتے دَسیا کہ صومالیہ وچ قزاقاں دے ہتھوں یرغمال بنائے گئے 4 پاکستانیاں نوں رہا کرا لیا گیا اے، جیہڑے اگلے روز وطن واپس پہنچن گے۔ رہائی پاؤن والیاں وچ یاسر خان، عقیل خان، امین بن شمس تے عثمانی غنی شامل نیں۔
انہاں آکھیا کہ شہید ہون والے 3 پاکستانیاں دے جسدِ خاکی وی وطن واپس لیاؤن لئی اقدامات جاری نیں، جدوں کہ جبوتی وچ پاکستانی سفارتخانہ رہائی پاؤن والیاں دی واپسی لئی کوششاں کر رہیا اے۔
