قصور: بھارتی بارڈر سکیورٹی فورس دی بلااشتعال فائرنگ، 2 پاکستانی شہید، 1 زخمی
نہتے شہریاں نے باڑ پار نہیں کیتی، بارڈر پلر توں چند قدم اگے ودھے تاں بی ایس ایف نے بغیر وارننگ نشانہ بنایا، شہید عظمت تے محسن دا لدھڑ پنڈ نال تعلق، بھارتی میڈیا نے درانداز قرار دے دِتا، واقعہ بارڈر معاہدے دی خلاف ورزی
اسلام آباد (خصوصی نیوز رپورٹر) بھارتی بارڈر سکیورٹی فورس (بی ایس ایف) نے قصور وچ پاک بھارت بین الاقوامی سرحد دے نیڑے تین پاکستانی شہریاں اُتے بلااشتعال فائرنگ کر دِتی، جس دے نتیجے وچ 2 نہتے پاکستانی شہری شہید تے اک زخمی ہو گیا۔
سکیورٹی ذرائع دے مطابق لدھڑ پنڈ نال تعلق رکھن والے تین مقامی پاکستانی شہری بارڈر پلر توں چند قدم اگے ہی ودھے سن کہ بی ایس ایف نے انہاں نوں بغیر وارننگ نشانہ بنایا۔ شہید ہون والے عظمت رسول ولد عطااللہ تے محسن جٹ دا تعلق جٹاں والی حویلی، لدھڑ نال اے۔
بھارتی میڈیا نے وی فالس فلیگ آپریشن دی روش نوں زندہ رکھدیاں معصوم شہریاں نوں درانداز قرار دے دِتا۔ تیناں افراد وچوں کسے نے وی بارڈر فینس پار کرن دی کوشش نہیں کیتی سی۔
سکیورٹی ذرائع دا کہنا اے کہ بھارتی فورسز ولوں شہریاں اُتے فائرنگ دا واقعہ بارڈر معاہدے تے ایس او پیز دی کھلم کھلا خلاف ورزی اے۔
