خیبرپختونخوا وچ ای فرد پورٹل تے ڈیجیٹل فیڈ بیک سسٹم دا اجرا
نویں ڈیجیٹل نظام دے تحت شہری گھر بیٹھے اپنی زمین دی فرد حاصل کر سکدے نیں، حکومت دی پہلی ترجیح عوام نوں انہاں دی دہلیز اُتے شفاف تے تیز تر سہولتاں فراہم کرنا: وزیراعلیٰ
پشاور (این این آئی) وزیراعلیٰ خیبرپختونخوا محمد سہیل آفریدی نے صوبے وچ لینڈ ریکارڈ دے نظام نوں جدید بناؤن لئی ای فرد پورٹل تے ڈیجیٹل پبلک فیڈ بیک سسٹم دا باقاعدہ افتتاح کر دِتا۔
اس موقع اُتے انہاں آکھیا کہ حکومت دی پہلی ترجیح عوام نوں انہاں دی دہلیز اُتے شفاف تے تیز تر سہولتاں فراہم کرنا اے، تاں جو شہریاں نوں ریونیو دفاتراں دے بار بار چکر نہ لاؤن پین۔
نویں ڈیجیٹل نظام دے تحت شہری ہُن گھر بیٹھے یا نیڑے دے مرکز توں آفیشل ویب سائٹ، نادرا ای سہولت تے ’دستک ایپ‘ دے ذریعے اپنی زمین دی فرد حاصل کر سکدے نیں۔
نادرا توں بائیومیٹرک تصدیق توں بعد فرد دی فیس ون لنک یا ایزی پیسہ دے ذریعے الیکٹرانک طور اُتے جمع کرائی جاوے گی۔
وزیراعلیٰ نے امید ظاہر کیتی کہ انہاں اصلاحات نال لینڈ ریکارڈ دے نظام اُتے عوام دا اعتماد بحال ہووے گا۔
تقریب دے اختتام اُتے انہاں نے ڈیجیٹل اصلاحات دے اجرا وچ اہم کردار ادا کرن والے حکام نوں تعریفی اسناد نال وی نوازیا۔
