جھگڑے توں بعد مناؤن دی پہل مریم ولوں ہوندی اے: محمد صفدر
کابینہ دا حصہ نہیں بنیا کیوں جو وزیراعلیٰ آؤندی اے تاں ساریاں نوں اٹھنا پیندا اے، میں کیوں اٹھاں؟ گھر وچ مٹھا آوے تاں مریم آکھدی اے چھپا دو، سارا صفدر کھا جاوے گا تے طبیعت خراب ہو جاوے گی
لاہور (مانیٹرنگ ڈیسک) وزیراعلیٰ پنجاب مریم نواز دے شوہر کیپٹن (ر) صفدر نے آکھیا اے کہ میاں بیوی وچ جھگڑے توں بعد مناؤن دی پہل مریم ولوں ہی ہوندی اے۔
کیپٹن (ر) صفدر حال ہی وچ اک یوٹیوب چینل دے پروگرام وچ شریک ہوئے، جتھے انہاں نے سیاسی تے ذاتی موضوعات اُتے دلچسپ گل بات کیتی۔
اک سوال دے جواب وچ کیپٹن (ر) صفدر نے دَسیا کہ اوہ اپنی اہلیہ مریم نواز اُتے حکم نہیں چلاؤندے، میرا تے مریم دا ادب، احترام تے عزت دا رشتہ اے۔ ساڈی شادی نوں 35 سال ہو چکے نیں، ساڈے 3 بچے تے انہاں دے نواسے وی نیں۔ میں ایس لئی کابینہ دا حصہ نہیں بنیا کیوں جو جدوں وزیراعلیٰ مریم نواز آؤندی اے تاں ساریاں نوں اٹھنا پیندا اے، میں کیوں اٹھاں؟
وزیراعلیٰ مریم نواز نال جھگڑے دے سوال اُتے کیپٹن (ر) صفدر نے آکھیا کہ ساڈے وچ بہت معمولی نوعیت دے جھگڑے ہوندے نیں تے ایس صورتحال وچ مریم نواز ولوں ہی پہل ہوندی اے۔
انہاں دَسیا کہ گھر وچ مٹھا آندا اے تاں مریم نواز آکھدی اے کہ چھپا دو، سارا صفدر ہی کھا جاوے گا تے طبیعت خراب ہو جاوے گی۔
