مذاکرات دے دروازے کھلے نیں: رانا ثناء اللہ، حکومتی ارکان نال رابطے: بیرسٹر گوہر، صوابی جا کے پلان دساں گے: سہیل آفریدی
نواں فوجی آپریشن نئیں ہووے گا: مشیر سیاسی امور، سہیل آفریدی دا رویہ ایمرجنسی دی راہ ہموار کر رہیا اے: طارق فضل، بلوچستان تاں تعاون کر رہیا اے، اتھے امن کیوں نئیں؟: وزیر اعلیٰ کے پی، مذاکرات غیر مشروط ہونے چاہیدے نیں: چیئرمین پی ٹی آئی، بانی نال ملاقات توں بغیر گل بات نئیں ہو سکدی: اچکزئی، مارچ ختم کرن دی کنجی عمران خان کول اے: یوسفزئی
اسلام آباد (مانیٹرنگ ڈیسک) وزیراعظم دے مشیر سیاسی امور رانا ثناء اللہ نے پی ٹی آئی نوں فیر مذاکرات دی پیشکش کردیاں آکھیا اے کہ مذاکرات دے دروازے کھلے نیں، پی ٹی آئی ذاتی مفادات چھڈ کے مذاکرات ول آوے، دروازے کھلے نیں۔
وفاقی دارالحکومت وچ پریس کانفرنس کردیاں اوہناں آکھیا کہ حکومت ولوں مذاکرات دے دروازے کھلے نیں، تاہم ریاست نوں یرغمال بنا کے کوئی مطالبہ منوایا نئیں جا سکدا۔ اوہناں آکھیا کہ ملک وچ سیاسی عدم استحکام دا آغاز 2014 وچ ہویا تے ایہ سلسلہ اج تک جاری اے، پی ٹی آئی دا واحد ایجنڈا ملک وچ عدم استحکام پیدا کرنا اے۔
رانا ثناء اللہ نے آکھیا کہ سیاسی اختلافات دا حل صرف مذاکرات دے ذریعے ممکن اے، ایس لئی پی ٹی آئی ذاتی مفادات نوں اک پاسے رکھ کے مسئلے دے حل ول ودھے۔ اوہناں آکھیا کہ تحریک انصاف لگاتار محاذ آرائی دی سیاست اُتے عمل پیرا اے، سیاسی جماعتاں نوں قومی سلامتی تے شہریاں دیاں زندگیواں اُتے اپنے سیاسی مفادات نوں ترجیح دین دی اجازت نئیں دِتی جا سکدی۔
وزیراعظم دے مشیر نے ایس تاثر نوں مسترد کر دِتا کہ حکومت خیبر پختونخوا وچ وڈے پیمانے اُتے فوجی آپریشن دی تیاری کر رہی اے، جس نال لوکاں نوں نقل مکانی کرنی پئے گی۔
ادھر ٹی وی نال گل کردیاں رانا ثناء اللہ نے آکھیا کہ وفاق اُتے حملہ آور ہوئے تاں کے پی حکومت آئینی جواز گوا بیٹھے گی۔ پارٹی دے طور اُتے لانگ مارچ کردے تاں وکھری گل سی، صوبائی حکومت وی شامل اے۔
اوہناں آکھیا کہ دہشت گرداں دا صفایا کرن توں بعد فوج نے نئیں بلکہ سول انتظامیہ نے کنٹرول سنبھالنا ہوندا اے۔ حالت ایہ اے کہ اک اک علاقہ 10،10 واری کلیئر کرن توں بعد انتظامیہ سنبھال لئی تیار نئیں، خیبر پختونخوا دے کجھ اضلاع وچ تھانے تک نئیں۔
وفاق عارضی طور اُتے صوبے دے معاملات اپنے ماتحت کرے گا تے انتظامیہ وی چلائے گا۔ اوہناں آکھیا کہ وفاق بعد وچ کے پی دے معاملات واپس منتقل کر دے گا، ایہ چیز معاہدے دا حصہ ہونی چاہیدی سی۔
اوہناں آکھیا کہ اساں مسودے وچ شق پائی سی کہ اک سیاسی کمیٹی بنے گی، جس وچ دوناں پاسیاں دے لوک شامل ہون گے۔ فیصلہ ہویا سی کہ سیاسی کمیٹی چھوٹے مسئلے حل کرے گی۔
رانا ثناء اللہ نے آکھیا کہ کے پی حکومت نوں اعتراض اے کہ ڈرون استعمال نہ ہووے، تاں ایہ کیویں ممکن اے؟ وزیراعظم نے چنگا مشورہ دِتا اے، لانگ مارچ وچ کی رکھیا اے؟ لانگ مارچ ختم کرو تے ساڈے نال آ کے بیٹھو۔ مذاکرات لئی حکومت ہمیشہ تیار رہی اے تے ہُن وی تیار اے۔
اسلام آباد وچ میڈیا نال گل کردیاں وفاقی وزیر برائے پارلیمانی امور طارق فضل چودھری نے آکھیا کہ سہیل آفریدی دا رویہ صوبے وچ ایمرجنسی دے نفاذ دی راہ ہموار کر رہیا اے۔ وفاقی حکومت نوں صوبے وچ ایمرجنسی لاؤن دا کوئی شوق نئیں۔
اوہناں آکھیا کہ جے خیبر پختونخوا وچ ایمرجنسی نافذ ہُندی اے تاں ایس دی وجہ وزیراعلیٰ ولوں شدت پسندی دے خلاف جاری حکومتی پالیسیواں وچ عدم تعاون ہووے گا۔
عمران خان دیاں ملاقاتاں دے معاملے اُتے وفاقی وزیر نے آکھیا کہ حکومت لئی ایہ انا دا مسئلہ نئیں تے نہ ای حکومت عمران خان نوں کسے قسم دی تکلیف دینا چاہندی اے۔ اوہناں دے مطابق عمران خان دی صحت تے علاج لئی ممکن حد تک بہترین سہولتیں فراہم کیتیاں گئیاں نیں، عمران خان دیاں بہناں دیاں اوہناں نال ملاقاتاں ماضی وچ وی ہُندیاں رہیاں نیں۔
اسلام آباد، کوئٹہ، پشاور (مانیٹرنگ ڈیسک) چیئرمین پی ٹی آئی بیرسٹر گوہر نے آکھیا اے کہ حکومتی ارکاناں نال ساڈے رابطے نیں تے کوشش اے کہ مسئلے دا حل گل بات دے ذریعے کڈیا جاوے۔ اساں مذاکرات توں انکار نئیں کر رہے، پر مذاکرات غیر مشروط ہونے چاہیدے نیں۔
میڈیا نال گل کردیاں اوہناں آکھیا کہ ملک، قوم تے جمہوریت لئی مذاکرات دا کامیاب ہونا ناگزیر اے۔ گورنر راج یا ایمرجنسی نئیں لگنی چاہیدی۔ وزیراعظم نے مذاکرات دی مشروط پیشکش کیتی اے، اساں سیاسی لوک آں، سیاسی لوک غیر مشروط طور اُتے بیٹھدے نیں۔
اوہناں آکھیا کہ حکومت نے باہر نکل کے اندر والیاں گلاں ڈسکس کیتیاں، جتنا وقت پریس کانفرنسز اُتے لایا، اونا مذاکرات اُتے لایا ہوندا تاں مسئلہ حل ہو جاندا۔
دوجے پاسے وزیراعلیٰ خیبر پختونخوا سہیل آفریدی نے خیبر وچ لانگ مارچ دے شرکاء نال خطاب کردیاں آکھیا کہ لانگ مارچ دے حوالے نال پلان دا اعلان صوابی جا کے کراں گا۔
اوہناں آکھیا کہ جدوں تک وزیراعلیٰ آں، خیبر پختونخوا وچ فوجی آپریشن نئیں ہون دیواں گا، عوام مخالف ہر پالیسی دی مزاحمت کراں گا۔
اوہناں آکھیا کہ کجھ روز پہلاں ہونے والے مذاکرات سیاسی نوعیت دے سن، جدوں کہ مسلط ذہنیت ساڈے کولوں اک ہور فوجی آپریشن دی دستاویز اُتے دستخط کرانا چاہندی سی۔ میں کدی وی ایس پالیسی دا حصہ نئیں بنوں گا۔
اوہناں آکھیا کہ وادی تیراہ دے عوام نوں شدید سردی وچ بے گھر کیتا گیا۔ انہاں لوکاں نوں عوام دیاں مشکلات دا کی احساس؟ فوجی آپریشنز توں پہلاں قبائلی عوام خوشحال سن۔ 2004ء وچ عمران خان نے فوجی آپریشنز دی مخالفت کیتی سی۔ قبائلی خاندانواں دی آبادکاری لئی وفاق ولوں فی گھرانہ 4 لاکھ روپے مختص کرنا ناقابل فہم اے۔
جنہاں دیاں بیویاں دے پرس دی قیمت 4 لاکھ توں ودھ اے، اوہ قبائلی خاندانواں دی آبادکاری لئی صرف 4 لاکھ دیندے نیں، کی اساں کیڑے مکوڑے آں؟
اوہناں آکھیا کہ ایہ آکھیا جاندا اے کہ خیبر پختونخوا حکومت تعاون نئیں کر رہی، بلوچستان حکومت تعاون کر رہی اے تاں اتھے امن کیوں نئیں؟
مزید آکھیا کہ عمران خان نے قبائلی عوام نوں شناخت تے عزت دِتی، 78 سال بعد وزیراعلیٰ دا عہدہ قبائلی عوام نوں ملیا اے۔ عمران خان ولوں دِتی عزت دی حفاظت کرنا اساں جاننے آں۔
عمران خان پاکستانی عوام دے حقاں دی جنگ لڑ رہے نیں، اساں ہر قیمت اُتے اپنا حصہ پاؤاں گے۔ میں اپنا مقدمہ عوام دے سامنے رکھ دِتا اے، ہُن فیصلہ عوام نے کرنا اے کہ اوہ میرے نال نیں یا اوہناں دے نال جنہاں انہاں دے گھر، حجرے تباہ تے مساجد شہید کیتیاں نیں۔
کابینہ دے اجلاس نال خطاب کردیاں اوہناں آکھیا کہ پیپلز پارٹی دے موجودہ اقدامات توں اک ہور مشرقی پاکستان بناؤن دی کوشش نظر آ رہی اے۔ جمہوریت دا نعرہ لاؤن والی جماعت نے ماضی وچ ذاتی مفادات لئی بنگلہ دیش نوں پاکستان توں جدا کیتا، ذاتی مفادات نوں قومی مفادات اُتے ترجیح دینا پیپلز پارٹی دا وتیرہ رہیا اے۔
اوہناں آکھیا کہ گورنر ولوں گزشتہ روز کیتا گیا ڈرامہ انتہائی افسوسناک تے قابل مذمت اے۔ خیبر پختونخوا وچ عوام دی دو تہائی اکثریت نال منتخب حکومت موجود اے، صوبائی اسمبلی، کابینہ تے حکومت مکمل طور اُتے فعال تے برقرار نیں۔
اوہناں آکھیا کہ گورنر، چیف سیکرٹری تے آئی جی نوں بلا رہے نیں تے غیر آئینی اجلاس کر رہے نیں۔ گورنر دا ایس نوعیت دے اجلاس دی صدارت کرنا آئین تے جمہوریت اُتے حملہ اے۔ اجلاس دی آئینی حیثیت اُتے ایڈووکیٹ جنرل توں رائے لئی جاوے گی۔
اوہناں آکھیا کہ وزیراعلیٰ نوں ہٹاؤن دا آئینی طریقہ موجود اے، ایس لئی عدم اعتماد دا طریقہ کار اختیار کیتا جاندا اے۔
اوہناں آکھیا کہ صوبے دی پولیس کول پاکستان وچ موجود کسے وی پولیس دے مقابلے وچ جدید ترین اسلحہ تے آلات موجود نیں۔ وفاق دی موجودہ پالیسی نہ خیبر پختونخوا وچ مؤثر اے تے نہ بلوچستان وچ، پالیسی وچ تبدیلی ضروری اے۔
ادھر اپوزیشن لیڈر محمود خان اچکزئی نے آکھیا اے کہ بانی پی ٹی آئی نال ملاقات توں بغیر مذاکرات نئیں ہو سکدے۔
ژوب وچ جلسے نال خطاب کردیاں اوہناں آکھیا کہ جے مسئلے دا حل چاہندے او تاں عمران خان نال ملاقات کروانی پئے گی۔ گارنٹی دیندے آں کہ بانی نال ملاقات توں بعد سارے مسئلے حل ہون تک مذاکرات ختم نئیں ہوون گے۔
اوہناں آکھیا کہ خیبر پختونخوا وچ گورنر راج لگیا تاں ملک دا ہر چوراہا بند کراں گے۔
اپوزیشن لیڈر نے مزید آکھیا کہ چیف الیکشن کمشنر تے ارکاناں دی تقرری اُتے وزیراعظم یا سپیکر دے دفتر وچ ملاقات نئیں ہووے گی، نواز شریف دے مری والے گھر وچ بیٹھ کے گل کرن لئی تیار آں۔
دریں اثنا پی ٹی آئی رہنما شوکت یوسفزئی نے آکھیا کہ لانگ مارچ کسے دباؤ دے تحت ختم نئیں ہووے گا، لانگ مارچ ختم کرن دی کنجی اڈیالہ جیل وچ بند عمران خان کول اے۔
شوکت یوسفزئی نے آکھیا کہ وزیراعظم صاحب میڈیا اُتے مذاکرات، مذاکرات نہ کھیڈو، جے اختیار نیں تاں ساڈے جائز مطالبے تسلیم کرو۔
اوہناں آکھیا کہ جے سہیل آفریدی نوں غیر جمہوری طریقے نال ہٹاؤن دی کوشش کیتی گئی تاں قبائلاں اندر وی تشویش پائی جاوے گی تے ایہ کسے صورت ملکی مفاد وچ نئیں ہووے گا۔
اوہناں آکھیا کہ گورنر خیبر پختونخوا نے کس حیثیت وچ آئی جی پولیس تے چیف سیکرٹری نوں طلب کیتا؟ 18ویں ترمیم توں بعد تاں گورنر کول اخروٹ توڑن دا اختیار وی نئیں، کی گورنر نے اپنے اختیارات توں تجاوز نئیں کیتا؟
اوہناں آکھیا کہ گورنر صاحب، ہُن تاں نہ ایمرجنسی لگی اے تے نہ گورنر راج۔
پی ٹی آئی رہنما اسد قیصر نے آکھیا اے کہ وفاقی حکومت ولوں خیبر پختونخوا حکومت دے خلاف چارج شیٹ انتہائی گمراہ کن تے حقائق دے منافی اے۔
خیبر پختونخوا حکومت نے محدود وسائل دے باوجود پولیس لئی صوبائی بجٹ دا 8.8 فیصد مختص کیتا اے، جو چاراں صوبیاں وچ سب توں زیادہ اے۔
’’ایکس‘‘ اُتے اپنے بیان وچ اوہناں آکھیا کہ خیبر پختونخوا پولیس دے بجٹ وچ 41 فیصد اضافہ کیتا گیا اے۔ خیبر پختونخوا وچ تقریباً اک لاکھ 40 ہزار پولیس اہلکار فرائض انجام دے رہے نیں۔
آبادی دے تناسب نال خیبر پختونخوا وچ فی پولیس اہلکار تقریباً 292 افراد آندے نیں، جدوں کہ پنجاب وچ ایہ تناسب 541 افراد اے۔
