پاکستان دے زرمبادلہ ذخائر مستحکم: آئی ایم ایف دا ٹیکس اہداف حاصل کرن اُتے اطمینان دا اظہار: معاشی جائزے دے مذاکرات مکمل، اج اہم پیش رفت متوقع
زرعی شعبے وچ انکم ٹیکس وصولی دے اہداف اُتے آئی ایم ایف دی تشویش، حکومت نے پیداواری لاگت ودھن تے کساناں دے مسلسل خسارے وچ ہون دا موقف پیش کیتا، ایم ای ایف پی دا ڈرافٹ معاشی ٹیم نال شیئر، اتفاق رائے اُتے 1.2 ارب ڈالر لئی سٹاف لیول معاہدہ ہون دی توقع، مذاکرات وچ مجموعی معاشی صورتحال دا جائزہ لیا گیا
اسلام آباد (مدثر علی رانا) آئی ایم ایف وفد تے معاشی ٹیم دے وچکار اقتصادی جائزے دے مذاکرات مکمل ہو گئے۔ آئی ایم ایف وفد دے کجھ ارکان مذاکرات کرن توں بعد واپس روانہ ہو گئے، جدوں کہ آئی ایم ایف وفد دے کجھ ارکان اج واپس روانہ ہو جان گے۔
ذرائع وزارت خزانہ دے مطابق اج آئی ایم ایف نال اہم پیش رفت متوقع اے، آئی ایم ایف تے معاشی ٹیم دے وچکار مذاکرات مکمل ہو گئے نیں۔ کجھ اہداف اُتے آئی ایم ایف نال ورچوئل وی گل بات ہووے گی۔
ذرائع وزارت خزانہ دے مطابق آئی ایم ایف نے پاکستان دے زرمبادلہ دے ذخائر نوں مستحکم قرار دے دِتا تے اطمینان دا اظہار کیتا۔ جولائی توں ستمبر ایف بی آر دے اہداف حاصل ہونا خوش آئند قرار دِتا گیا، ٹیکس آمدن دا ہدف حاصل ہون دی وجہ توں پہلی سہ ماہی وچ اہم معاشی کامیابیاں حاصل ہوئیاں۔
رواں سال دے آخر وچ کساناں لئی فکسڈ ٹیکس سکیم وی متعارف کراؤن اُتے گل بات ہوئی۔ سٹیٹ بینک نے زرمبادلہ دے ذخائر مستحکم بناؤن تے افراط زر نوں کنٹرول کرن لئی اقدامات کیتے۔
آئی ایم ایف وفد نے معاشی ٹیم نال میمورنڈم آف اکنامک اینڈ فنانشل پالیسیز (ایم ای ایف پی) دا ڈرافٹ شیئر کر دِتا۔ ایم ای ایف پی اُتے اتفاق رائے پیدا ہون تے تقریباً 1.2 ارب ڈالر دے سٹاف لیول معاہدے دی صورت وچ پاکستان نوں رقم ملے گی۔
آئی ایم ایف نال مذاکرات دوران وفد نے مجموعی معاشی صورتحال اُتے اطمینان دا اظہار کیتا، جدوں کہ آئی ایم ایف نے زرعی شعبے وچ انکم ٹیکس دی وصولی دے اہداف اُتے تشویش وی ظاہر کیتی۔
وزارت خزانہ دے مطابق معیشت دے استحکام، محصولات تے مالیاتی نظم و ضبط نال متعلق معاملات اُتے گل بات ہوئی۔ آئی ایم ایف مشن پاکستان دے معاشی تے مالیاتی اقدامات بارے حکام نال آئندہ وی گل بات جاری رکھے گا۔
باوثوق ذرائع توں معلوم ہویا اے کہ آئی ایم ایف نوں بریفنگ دِتی گئی کہ پاکستان وچ زرعی شعبے دی پیداواری لاگت دی وجہ توں کسان مسلسل خسارے وچ نیں۔ پاکستان وچ زیادہ تر کسان اینے خوشحال نئیں کہ اوہ انکم ٹیکس دین دے قابل ہون۔
آئی ایم ایف نال مذاکرات دوران وفاقی حکومت نے کاشت کاراں دے موقف دی حمایت کیتی، جس وچ دَسیا گیا کہ خطے دی کشیدہ صورتحال دی وجہ توں پیداواری لاگت مسلسل ودھ رہی اے۔
صوبائی حکومتاں زرعی انکم ٹیکس دا حجم ودھاؤن لئی اقدامات کر رہیاں نیں، پر ہن تک خاطر خواہ نتائج حاصل نئیں ہو سکے۔
فیڈرل بورڈ آف ریونیو نے آئی ایم ایف نوں ڈیجیٹلائزیشن دے اقدامات بارے آگاہ کیتا۔ صوبیاں وچ نان ٹیکس ریونیو ودھا کے سرپلس دے اہداف حاصل کرن اُتے وی بریفنگ دِتی گئی۔
وزیر خزانہ محمد اورنگزیب دی آئی ایم ایف مشن نال اہم ورچوئل مذاکرات ہوئے۔ پاکستان تے آئی ایم ایف دے وچکار ای ایف ایف دے چوتھے جائزے اُتے گل بات کیتی گئی۔ آئی ایم ایف مشن نال آر ایس ایف دے تیجے جائزے اُتے وی تفصیلی گل بات ہوئی۔
معاشی ٹیم نے آئی ایم ایف وفد نوں ملکی معاشی تے اقتصادی صورتحال اُتے بریفنگ دِتی۔ وزیر خزانہ نے معاشی استحکام تے اصلاحات بارے حکومت دی پیش رفت توں آگاہ کیتا۔
اجلاس وچ آئی ایم ایف پروگرام دے تحت مقررہ اہداف تے پیش رفت دا جائزہ لیا گیا۔ پاکستان دی معاشی کارکردگی، مالیاتی معاملات تے اصلاحاتی اقدامات اُتے گفتگو ہوئی۔ آئی ایم ایف پروگرام دے اہداف حاصل کرن تے آئندہ دے لائحہ عمل اُتے وی تبادلہ خیال کیتا گیا۔
