ایس ایم ایز لئی قرضیاں دا حجم 23 ارب توں ودھ گیا: وزیر خزانہ
پاکستان امداد اُتے انحصار توں تجارت تے سرمایہ کاری ول منتقل ہو رہیا اے: محمد اورنگزیب دی مائیکروفنانس کانفرنس، فنانس سٹیئرنگ کمیٹی دے اجلاس وچ گفتگو
کراچی (اے پی پی) وفاقی وزیر خزانہ سینیٹر محمد اورنگزیب نے آکھیا اے کہ معاشی استحکام، پائیدار اقتصادی ترقی، ڈھانچہ جاتی اصلاحات، تجارت تے سرمایہ کاری، نویں معیشت تے مالی سہولتاں تک رسائی حکومت دیاں چھ اہم ترجیحات نیں۔
پاکستان مائیکروفنانس نیٹ ورک دی 10ویں سالانہ مائیکروفنانس کانفرنس نوں ورچوئل خطاب کردیاں وزیر خزانہ نے آکھیا کہ پاکستان دے دہرے خسارے، جیہڑے بلند ترین سطح اُتے جی ڈی پی دے تقریباً 12.5 فیصد تک پہنچ گئے سن، پچھلے مالی سال دے اختتام اُتے گھٹ کے 2.6 فیصد رہ گئے۔ ملک دے زرمبادلہ دے ذخائر 21.4 ارب ڈالر دی تاریخی بلند سطح اُتے پہنچ گئے نیں، جیہڑے تقریباً تِن مہینیاں دیاں درآمدات لئی کافی نیں۔
پاکستان امداد اُتے انحصار توں تجارت تے سرمایہ کاری ول منتقل ہو رہیا اے۔ وزیر خزانہ نے آکھیا کہ ایس ایم ایز، زراعت تے سستی رہائش لئی مالی معاونت ودھاؤن واسطے کمرشل بینکاں تے مائیکروفنانس شعبے دے درمیان مضبوط تعاون ضروری اے۔
زرعی شعبے تے ایس ایم ایز وچ نویں قرض لین والے افراد دی تعداد ودھانا مائیکروفنانس شعبے دی اہم ترجیح ہونی چاہیدی اے۔ برآمدی ری فنانس دی حد اک کھرب روپے توں ودھا کے ڈیڑھ کھرب روپے کر دِتی گئی اے، جدوں کہ نویں حد دا 20 فیصد ایس ایم ایز لئی مختص اے۔
دریں اثنا وزیر خزانہ محمد اورنگزیب دی زیرِصدارت ایکسیس ٹو فنانس سٹیئرنگ کمیٹی دا پنجواں اجلاس ہویا، جس دوران وزیر خزانہ نے آکھیا کہ ایس ایم ایز لئی قرضیاں دا حجم 23 ارب روپے ودھ گیا اے۔
اجلاس وچ بریفنگ دوران دَسیا گیا کہ جون وچ ایس ایم ای فنانسنگ 1.114 ٹریلین روپے سی، جیہڑی ستمبر 2026 وچ ودھ کے 1.137 ٹریلین روپے ہو گئی۔ ایس ایم ای قرض لین والے افراد دی تعداد 25 ہزار توں ودھ کے 3 لکھ 50 ہزار 862 ہو گئی اے۔
اعلامیے دے مطابق وزیر خزانہ نے ایس ایم ای فنانسنگ وچ ہور تیزی لیاؤن دی ہدایت کر دِتی اے۔
