سہیل آفریدی دی الیکشن کمیشن خلاف درخواست خارج

سہیل آفریدی دی الیکشن کمیشن خلاف درخواست خارج

این اے 118 دے جلسے وچ قوانین دی خلاف ورزی اُتے کارروائی نوں چیلنج کیتا گیا سی، الیکشن کمیشن فریق نوں سنے بغیر فیصلہ کردا تاں شکایت کیتی جا سکدی سی: پشاور ہائیکورٹ

پشاور (اے پی پی) پشاور ہائیکورٹ نے وزیراعلیٰ خیبر پختونخوا سہیل آفریدی دی الیکشن کمیشن دی کارروائی خلاف دائر درخواست خارج کر دِتی۔

سہیل آفریدی نے این اے 18 ہری پور دے ضمنی انتخابات دوران مبینہ انتخابی قوانین دی خلاف ورزی اُتے الیکشن کمیشن دی کارروائی نوں چیلنج کیتا سی۔

سماعت دوران الیکشن کمیشن نے عدالت نوں دَسیا کہ این اے 18 ہری پور وچ عمر ایوب دے حق وچ جلسہ منعقد کیتا گیا، جیہڑا انتخابی قوانین دی خلاف ورزی دے زمرے وچ آندا اے۔ خلاف ورزی دیاں رپورٹس سوشل تے قومی میڈیا اُتے سامنے آون دے علاوہ اک شہری نے وی الیکشن کمیشن وچ شکایت درج کرائی۔ شکایت اُتے انکوائری افسر مقرر کرکے سہیل آفریدی نوں نوٹس جاری کیتے گئے۔

جسٹس ارشد علی نے استفسار کیتا کہ الیکشن کمیشن دی ازخود کارروائی قانون خلاف کِیویں اے؟ انکوائری وچ قانونی خامی کتھے اے؟ جے الیکشن کمیشن کسے فریق نوں سنے بغیر فیصلہ کردا تاں فریق شکایت کر سکدا سی کہ اوہنوں سُنیا نئیں گیا۔

سہیل آفریدی دے وکیل نے آکھیا کہ الیکشن کمیشن نے انتخابات توں پہلاں ازخود کارروائی شروع کیتی تے قانون دے مطابق فیصلہ وی انتخابات توں پہلاں ہونا چاہیدا سی۔ وکیل نے دَسیا کہ انہاں نے کیپٹن صفدر دے اعلانیاں خلاف مہم شروع کیتی سی، تاہم الیکشن کمیشن نے انہاں خلاف کارروائی پہلی سماعت اُتے ہی ختم کر دِتی۔

عدالت نے استفسار کیتا کہ اس کارروائی خلاف شکایت کیوں نئیں کیتی گئی؟

الیکشن کمیشن نے دَسیا کہ سہیل آفریدی خلاف ہن تک کوئی حتمی فیصلہ نئیں کیتا گیا تے کمیشن دے 3 قسماں دے فیصلے خلاف اپیل دا قانونی حق موجود اے۔

عدالت نے درخواست خارج کر دِتی۔