پاکستان، برطانیہ دا غیر قانونی امیگریشن تے سمگلنگ روکّن اُتے اتفاق
محسن نقوی، طلال دی برطانوی وزیر نال ملاقات، سانجھے مفاد لئی باہمی تعاون اُتے گل بات، پولینڈ دے وزیر داخلہ نال ملاقات وچ دوطرفہ سکیورٹی تعاون تے ہور امور اُتے تبادلہ خیال
اسلام آباد (اے پی پی) وفاقی وزیر داخلہ محسن نقوی تے وزیر مملکت برائے داخلہ طلال چودھری نال برطانوی وزیر مملکت برائے خارجہ امور سٹیفن ڈاٹی نے ملاقات کیتی، جس وچ پاک برطانیہ تعلقات، سکیورٹی امور تے سانجھے مفادات دے شعبیاں وچ باہمی تعاون نوں ہور فروغ دین اُتے تفصیلی تبادلہ خیال کیتا گیا۔
ملاقات وچ غیر قانونی امیگریشن، جعلی سٹوڈنٹ ویزیاں دے ذریعے برطانیہ جان دے رجحان نوں روکّن، انسدادِ دہشت گردی تے انسدادِ منشیات لئی مؤثر سانجھی حکمتِ عملی اپنان اُتے زور دتا گیا۔ دونویں ملکا ں نے غیر قانونی سرگرمیاں دی روک تھام لئی جلد مفاہمتی یادداشت (ایم او یو) اُتے دستخط کرن اُتے اتفاق کیتا۔
ایس موقعے اُتے سکیورٹی تے امیگریشن نال متعلق قائم سانجھے ورکنگ گروپ دی 90 روزہ کارکردگی تے آئندہ دے لائحہ عمل دا وی جائزہ لیا گیا۔
دونویں رہنماؤں نے خطے وچ کشیدگی گھٹاؤن لئی سفارتی کوششاں جاری رکھن اُتے اتفاق کیتا تے مشرقِ وسطیٰ وچ امن لئی پاکستان دے مثبت کردار نوں سراہیا۔ برطانوی وزیر مملکت سٹیفن ڈاٹی نے پاکستان وچ آن لائن فراڈ تے سائبر کرائمز وچ ملوث منظم عناصر دے خلاف بھرپور کارروائیاں دی تعریف کیتی۔
دریں اثنا محسن نقوی تے طلال چودھری نال پولینڈ دی کونسل آف منسٹرز دے سربراہ تے وزیر توماش شیمونیاک نے ملاقات کیتی۔ ایس دوران دوطرفہ سکیورٹی تعاون، انٹیلی جنس شیئرنگ تے منظم جرائم دی روک تھام بارے تبادلہ خیال کیتا گیا۔
وزارتِ داخلہ ولوں جاری بیان مطابق ملاقات دوران اتفاقِ رائے ہویا کہ دونویں ملکا ں وچ میوچل لیگل اسسٹنس سمیت مختلف مفاہمتی یادداشتاں نوں جلد حتمی شکل دتی جاوے گی۔ وزیر مملکت طلال چودھری دی سربراہی وچ وزارتِ داخلہ دا اک اعلیٰ سطحی وفد جلد پولینڈ دا دورہ کرے گا۔
محسن نقوی نے آگاہ کیتا کہ حکومتی اقدامات دے نتیجے وچ پاکستان توں یورپ ول غیر قانونی امیگریشن وچ 64 فیصد نمایاں کمی آئی اے۔
