اسلام آباد بلدیاتی انتخابات لئی قانون سازی، الیکشن کمیشن دا حکومت نوں مراسلہ لکھن دا فیصلہ
آرڈیننس دی مدت پوری، پارلیمنٹ توں منظوری نہ ہوئی تاں انتخابات 2015 دے قانون دے تحت کراؤن گے، نویں نظام وچ موجودہ میٹروپولیٹن کارپوریشن دی جگہ اسلام آباد وچ تِن ٹاؤن کارپوریشنز قائم کیتیاں جان گیاں۔
اسلام آباد (ایس ایم زمان) الیکشن کمیشن پاکستان نے اسلام آباد وچ مقامی حکومت دے انتخابات کراؤن لئی قانون سازی دے سلسلے وچ وفاقی حکومت نوں مراسلہ لکھن دا فیصلہ کیتا اے۔ وفاقی وزارتِ داخلہ دا اسلام آباد لوکل گورنمنٹ ترمیمی آرڈیننس 2026 اپنی مدت پوری کر چکیا اے، جدویں کہ ایس دی پارلیمنٹ توں منظوری نہیں ہوئی۔
الیکشن کمیشن دے مطابق منظوری نہ ہون دی صورت وچ اسلام آباد وچ مقامی حکومت دے انتخابات 2015 دے قانون دے تحت کرائے جان گے۔ ترمیمی آرڈیننس دے تحت اسلام آباد وچ موجودہ میٹروپولیٹن کارپوریشن دی جگہ تِن ٹاؤن کارپوریشنز قائم کیتیاں جان گیاں۔ ہر ٹاؤن کارپوریشن، جتھوں تک ممکن ہووے، اسلام آباد دی حدود وچ موجود قومی اسمبلی دے اک حلقے دی علاقائی حدود دے مطابق ہووے گی۔
یونین کونسلز دی تعداد حکومت آبادی، تازہ ترین مردم شماری تے انتظامی ضرورت نوں مدِنظر رکھدیاں مقرر کرے گی۔ حکومت ضرورت دے مطابق یونین کونسلز دیاں حدود مقرر، تبدیل، ضم یا ختم وی کر سکدی اے، تاہم انتخابی شیڈول جاری ہون توں بعد حدود وچ تبدیلی نہیں کیتی جا سکے گی۔
نویں نظام دے تحت ہر ٹاؤن کارپوریشن وچ اک میئر، دو ڈپٹی میئر، یونین کونسلز دے چیئرمین، چار خواتین، اک کسان یا مزدور، اک تاجر یا کاروباری شخص، اک نوجوان تے اک غیر مسلم رکن شامل ہووے گا۔
یونین کونسل دے جنرل ارکان دا انتخاب بالغ حقِ رائے دہی تے خفیہ رائے شماری دے ذریعے ہووے گا۔ ہر یونین کونسل نوں کثیر رکنی وارڈ سمجھیا جاوے گا تے سب توں ودھ ووٹ حاصل کرن والے نو امیدوار جنرل ارکان منتخب ہون گے۔
یونین کونسل دے چیئرمین تے وائس چیئرمین دا انتخاب جنرل تے مخصوص نشستاں اُتے منتخب ارکان ہتھ چُک کے کرن گے۔ ایس طرح ٹاؤن کارپوریشن دے ارکان میئر تے دو ڈپٹی میئر منتخب کرن گے۔
مقامی حکومت فعال نہ ہون دی صورت وچ حکومت منتظم مقرر کر سکے گی، جیہڑا منتخب حکومت دے عہدہ سنبھالن تک اختیارات استعمال کرے گا۔
مقامی حکومت نوں ٹیکس، فیس، شرح، کرایہ، ٹول، چارج یا سرچارج عائد کرن دا اختیار ہووے گا، تاہم ٹیکس دی تجویز حکومت دی جانچ توں بعد مقررہ قانونی طریقہ کار دے تحت نافذ ہووے گی۔
آرڈیننس دا مقصد اختیارات تے ذمہ واریاں نوں نچلی سطح تک منتقل کرکے مقامی طرزِ حکمرانی تے عوامی خدمتاں نوں بہتر بنانا اے۔
