قائمہ کمیٹی دی ڈی جی حج جدہ دی اجلاس وچ عدم شرکت اُتے برہمی
منسوخ ہوئیاں فضائی ٹکٹاں دا ریکارڈ طلب، اگلے اجلاس وچ لازمی شرکت دی ہدایت، تحقیقات مکمل ہون تک دم دما مندر راولپنڈی نہ ڈھایا جاوے: سینیٹر حافظ عبدالکریم
اسلام آباد (سید قیصر شاہ) سینیٹ دی قائمہ کمیٹی برائے مذہبی امور تے بین المذاہب ہم آہنگی دا اجلاس کنوینر سینیٹر حافظ عبدالکریم دی صدارت وچ ہویا۔ کمیٹی نے وار وار ہدایتاں دے باوجود ڈی جی حج جدہ دی اجلاس وچ عدم شرکت اُتے شدید برہمی دا اظہار کیتا۔
سیکرٹری وزارت مذہبی امور نے دَسیا کہ ڈی جی حج 21 ستمبر دے اجلاس وچ شرکت لئی تیار سن، پر اجلاس ملتوی ہون دے باعث اوہناں دا سفر منسوخ ہو گیا، جدکہ کفایت شعاری دے اقدامات تے بیرونِ ملک سفر اُتے پابندیاں دی وجہ توں اوہ پاکستان نہیں آ سکے۔ وزارت اگلے اجلاس وچ اوہناں دی شرکت یقینی بناؤن لئی نائب وزیراعظم دی سربراہی وچ متعلقہ فورم توں خصوصی اجازت حاصل کرے گی۔
سینیٹر ناصر محمود نے ڈی جی حج دے طرزِ عمل تے مسلسل غیرحاضری اُتے تشویش دا اظہار کردیاں وزارت توں اوہناں دی منسوخ ہوئیاں فضائی ٹکٹاں دا ریکارڈ طلب کیتا تے اگلے اجلاس وچ اوہناں دی شرکت یقینی بناؤن دی ہدایت کیتی۔
کنوینر نے موجودہ ڈی جی حج دی مدتِ ملازمت مکمل ہون دے باوجود عہدے اُتے برقرار رہن اُتے وی سوال اٹھایا۔ سیکرٹری مذہبی امور نے دَسیا کہ 36 امیدوار اہل قرار پائے سن تے تین بہترین امیدواراں دا پینل وزیراعظم نوں بھجوایا گیا، تاہم پینل دی منظوری نہ ملن اُتے نویں بھرتی دا عمل شروع کرن دی ہدایت کیتی گئی، جس اُتے دوبارہ بھرتی دا عمل جاری اے۔
اجلاس وچ راولپنڈی دے دم دما مندر دے آلے دوالے رہائشیواں تے دکانداراں دے معاملے اُتے وی غور کیتا گیا۔ چیئرمین متروکہ وقف املاک بورڈ نے دَسیا کہ مندر/گوردوارے دی اراضی تقریباً 2 کنال 14 مرلے اُتے مشتمل اے تے اتھے تجاوزات خلاف کارروائی متروکہ وقف املاک بورڈ دے ترقیاتی منصوبے دے تحت عبادت گاہ دی تعمیرِ نو تے بحالی لئی شروع کیتی گئی اے۔
کمیٹی نے متعلقہ حکام نوں معاملے دی مکمل تحقیقات کرن دی ہدایت کیتی تے مسائل دا جائزہ لین لئی ذیلی کمیٹی تشکیل دین دا فیصلہ کیتا۔ کنوینر نے ذیلی کمیٹی دی تحقیقات مکمل ہون تک انہدامی کارروائی فوری طور اُتے روکّن دی ہدایت کر دِتی۔
