پنشن لین لئی ای او بی آئی دیاں شرطاں پوری کرنا لازمی اے: وفاقی آئینی عدالت

قانونی اہلیت ہمدردی دی بنیاد اُتے ختم نہیں ہو سکدی: وفاقی آئینی عدالت

اسلام آباد ہائیکورٹ، وفاقی محتسب تے صدر پاکستان دے حکم کالعدم قرار۔ پنشن لئی 15 سال دی شراکت ضروری، درخواست گزار دی بیمہ شدہ ملازمت چھ سال توں وی گھٹ سی: تحریری حکمنامہ

اسلام آباد (کورٹ رپورٹر) ای او بی آئی قانون دیاں لازمی شرطاں پوری نہ کرن والے شخص نوں پنشن نہیں دِتی جا سکدی۔ وفاقی آئینی عدالت نے قرار دتا اے کہ پنشن دے قانونی تقاضے پورے نہ کرن والے شخص نوں پنشن دین دا حکم جاری نہیں کیتا جا سکدا۔ قانونی حق دے تنازعے نوں محض بدانتظامی قرار دے کے وفاقی محتسب دے دائرۂ اختیار وچ وی اضافہ نہیں کیتا جا سکدا۔

وفاقی آئینی عدالت نے ای او بی آئی دی اپیل منظور کردیاں اسلام آباد ہائیکورٹ دا فیصلہ تے وفاقی محتسب نال صدر پاکستان دے حکم کالعدم قرار دے دتے۔

چیف جسٹس امین الدین خان نے تین رکنی بینچ دا 12 صفحیاں اُتے مشتمل تحریری حکمنامہ لکھیا۔ درخواست گزار دی طرفوں عمر اعجاز گیلانی عدالت وچ پیش ہوئے۔

عدالت نے قرار دتا کہ وفاقی محتسب پنشن دی اہلیت دا فیصلہ کرن لئی مخصوص قانونی طریقۂ کار نوں نظرانداز نہیں کر سکدا۔ پنشن دی درخواست مسترد ہونا اپنے آپ وچ بدانتظامی نہیں اے۔ بدانتظامی ثابت کرن لئی من مانی، امتیازی سلوک، غفلت یا بلاجواز تاخیر ورگے عناصر دا ہونا ضروری اے۔

تحریری حکمنامے وچ آکھیا گیا کہ قانون دیاں لازمی شرطاں اُتے عمل کرن نال درخواست گزار نوں نقصان پہنچنا بدانتظامی نہیں بن جاندا۔

عدالت نے واضح کیتا کہ قانونی اہلیت دی لازمی شرط نوں ہمدردی یا انصاف دے عام تصور دی بنیاد اُتے ختم نہیں کیتا جا سکدا۔

عدالت دے مطابق ای او بی آئی قانون تحت پنشن حاصل کرن لئی عام طور اُتے گھٹ توں گھٹ 15 سال دی شراکت ضروری اے، جدکہ یکم جولائی 2008 یا اوہدے بعد بیمہ شدہ ملازماں اُتے پنج سال دی خصوصی رعایت لاگو نہیں ہوندی۔

تحریری حکمنامے دے مطابق جاوید اقبال بھٹی دی بیمہ شدہ ملازمت چھ سال توں وی گھٹ سی، ایس لئی اوہ پنشن دے حق دار نہیں سن۔ پہلے دِتی گئی 48 ہزار روپے دی اولڈ ایج گرانٹ وی پنشن دا حق پیدا نہیں کردی۔