پختونخوا: دراندازی دی کوشش ناکام، 12 خوارج تے افغان طالبان ہلاک، نائب صوبیدار شہید
پختونخوا: دراندازی دی کوشش ناکام، 12 خوارج تے افغان طالبان ہلاک، نائب صوبیدار شہید
سکیورٹی فورسز نے ضلع کرم وچ پاک افغان سرحد اُتے پاکستان وچ داخل ہون دی کوشش کرن والے گروہ خلاف کارروائی کیتی: آئی ایس پی آر
بلوچستان وچ افغانستان توں اسلحہ سمگل کرن دی کوشش وی ناکام، گولہ بارود نال بھری گاڑی پکڑ لئی گئی، سرچ آپریشن جاری
پشاور، راولپنڈی، اسلام آباد (مانیٹرنگ ڈیسک، آئی این پی، نامہ نگار) خیبر پختونخوا وچ سکیورٹی فورسز نے پاک افغان سرحد اُتے دراندازی دی کوشش ناکام بناندیاں 12 خوارج تے افغان طالبان نوں ہلاک کر دِتا، جدکہ فائرنگ دے تبادلے وچ اک نائب صوبیدار شہید ہو گیا۔
پاک فوج دے شعبۂ تعلقاتِ عامہ (آئی ایس پی آر) دے مطابق سکیورٹی فورسز نے ضلع کرم وچ پاک افغان سرحد اُتے پاکستان وچ داخل ہون دی کوشش کرن والے گروہ دی نقل و حرکت دا پتا لایا تے کارروائی کردیاں 12 خوارج تے افغان طالبان نوں ہلاک کر دِتا۔
دراندازی دی کوشش دوران خوارج دی مدد لئی افغان طالبان دیاں چوکیاں توں وی فائرنگ کیتی گئی۔ فائرنگ دے تبادلے وچ نائب صوبیدار ہدایت امان شہید ہو گئے۔ 40 سالہ شہید نائب صوبیدار ہدایت امان دا تعلق ضلع غذر نال سی۔
آئی ایس پی آر دا کہنا اے کہ ایہہ واقعہ افغان سرزمین نوں دہشت گرد تنظیمیں ولوں استعمال کرن توں روکّن وچ ناکامی بارے پاکستان دے مؤقف دی تصدیق کردا اے۔ آئی ایس پی آر دے مطابق افغان طالبان رجیم سرحد پار دہشت گردی روکّن دی بجائے اس دی سہولت کاری تے سرپرستی کر رہی اے۔
علاقے وچ موجود ہور بھارتی سرپرستی یافتہ خوارج دے خاتمے لئی کلیئرنس آپریشن وی کیتا گیا۔ آئی ایس پی آر دے مطابق بیرونی سرپرستی تے مدد نال ہون والی دہشت گردی دے خاتمے لئی سکیورٹی فورسز تے قانون نافذ کرن والے اداریاں دیاں کارروائیاں جاری رہن گیاں۔
بیان وچ آکھیا گیا کہ بہادر سپاہیاں دیاں قربانیاں ملکی سرحداں دی حفاظت دے عزم نوں ہور مضبوط کردیاں نیں۔
بلوچستان وچ اسلحہ تے گولہ بارود نال بھری گاڑی پکڑی گئی
دوجے پاسے بلوچستان دے ضلع پشین وچ سکیورٹی فورسز نے انٹیلی جنس معلومات دی بنیاد اُتے کارروائی کردیاں افغانستان توں گولہ بارود لیاؤن دی کوشش ناکام بنا دِتی۔
سکیورٹی ذرائع دے مطابق ایف سی بلوچستان تے سکیورٹی فورسز نے آپریشن ردالفتنہ دے تحت سانجھی کارروائی کیتی تے سرانان وچ اک گودام اُتے چھاپہ مار کے اسلحے تے گولہ بارود نال بھری گاڑی پکڑ لئی۔
گاڑی وچوں 3 آر پی جی، 4 لائٹ مشین گنز، اک مشین گن، دستی بم، راکٹس تے گولہ بارود برآمد ہویا۔
سکیورٹی ذرائع دے مطابق سرانان وچ دہشت گرد عناصر دی ممکنہ موجودگی دے پیشِ نظر سرچ آپریشن جاری اے۔
وزیراعظم شہباز شریف ولوں سکیورٹی فورسز نوں خراجِ تحسین
وزیراعظم شہباز شریف نے ضلع کرم وچ پاک افغان سرحد اُتے دہشت گرداں دی دراندازی دی کوشش ناکام بناؤن تے 12 خوارج تے افغان طالبان نوں ہلاک کرن اُتے سکیورٹی فورسز نوں خراجِ تحسین پیش کیتا۔
وزیراعظم نے کارروائی دوران نائب صوبیدار ہدایت امان دی شہادت اُتے گہرے دکھ تے افسوس دا اظہار وی کیتا۔
انہاں آکھیا کہ نائب صوبیدار ہدایت امان نے وطن دیاں سرحداں دی حفاظت کردیاں بہادری تے فرض شناسی دی عظیم مثال قائم کیتی۔ دہشت گردی خلاف جنگ وچ پوری قوم اپنی بہادر سکیورٹی فورسز دے نال کھڑی اے۔
