سعودی سرکاری تیل کمپنی دے ہیڈ کوارٹر اُتے میزائل حملے نال تباہی، پوری دنیا دی معیشت متاثر ہو سکدی اے: آئی ایم ایف
ظہران وچ آرامکو دی عمارت دی چھٹی توں دسویں منزل تک اگ نال متاثر، کمپنی دے کجھ کم ہور ملکاں دے دفاتراں وچ منتقل، ریاض وچ کئی دھماکیاں دیاں آوازاں، حملیاں دے باعث سعودی عرب وچ ٹینس ٹورنامنٹ ملتوی، سعودی فوجی اتحاد دے مغربی یمن وچ تیل دیاں تنصیبات اُتے حملے، صنعا وچ پٹرول پمپاں اُتے شہریاں دیاں قطاراں
ظہران (نیوز ایجنسیاں) — یمن دے حوثی باغیاں نے بدھ دے روز سعودی عرب دی سرکاری تیل کمپنی آرامکو دیاں تنصیبات نوں میزائل نال نشانہ بناؤن دا دعویٰ کیتا اے۔ منگل نوں کیتے گئے حملے وچ ظہران وچ کمپنی دے ہیڈ کوارٹر نوں وڈے پیمانے اُتے نقصان پہنچیا تے عمارت دیاں کئی منزلاں وچ اگ پھیل گئی۔
ایس معاملے نال براہِ راست واقف تِن افراد نے رائٹرز نوں دسیا کہ عمارت دی چھٹی توں دسویں منزل تک اگ نال متاثر ہوئیاں، جدکہ عمارت دیاں اُتلیاں تِن منزلاں نوں شدید نقصان پہنچیا اے۔ دو ذرائع دے مطابق کجھ ملازماں نوں گھر توں کم کرن دی ہدایت دِتی گئی اے، جدکہ اک ہور ذریعے نے دسیا کہ کمپنی دے کجھ کم ہور ملکاں وچ واقع دفاتراں وچ منتقل کر دِتے گئے نیں۔ سرکاری حکام دے مطابق حملے وچ چار افراد زخمی ہوئے۔
حوثی فوجی ترجمان یحییٰ سریع نے آکھیا کہ انہاں دیاں فوجاں نے ظہران وچ آرامکو، ریاض دے ہوائی اڈے تے دارالحکومت دی اک تیل صاف کرن والی فیکٹری نوں نشانہ بنا کے کارروائی کیتی۔ انہاں دے مطابق حملیاں وچ وڈی تعداد وچ بیلسٹک تے کروز میزائلاں دے نال ڈرون وی ورتے گئے۔ انہاں دھمکی دِتی کہ آؤن والے دناں وچ سعودی عرب دے ہوائی اڈیاں تے تیل دیاں تنصیبات نوں ہور نشانہ بنایا جائے گا۔
بدھ نوں دارالحکومت ریاض وچ کئی دھماکیاں دیاں آوازاں سنائیاں دِتیاں گئیاں۔ شہریاں دے موبائل فونز اُتے فضائی خطرے بارے خبردار کرن والے پیغام موصول ہوئے، جنہاں وچ انہاں نوں محفوظ تھاواں اُتے پناہ لین دی ہدایت دِتی گئی۔
ریاض وچ معمول دے مقابلے ٹریفک وی گھٹ رہی، جدکہ سکولاں وچ آن لائن تعلیم تے کجھ کمپنیاں وچ گھر توں کم کرن دے انتظامات کیتے گئے۔
ایس توں علاوہ حملیاں دے باعث سعودی عرب وچ ٹینس ٹورنامنٹ ملتوی کر دِتا گیا۔ ایہ ٹورنامنٹ 21 توں 24 اکتوبر تک ریاض وچ ہونا سی تے ایس نوں نیٹ فلکس اُتے براہِ راست نشر کیتا جانا سی۔ مقابلےآں وچ نوواک جوکووچ، کارلوس الکاراز، الیگزینڈر زیوریف، ٹیلر فرٹز، لرنر ٹیئن تے ایلکس ڈی میناور نے حصہ لینا سی۔
ایس توں پہلاں سعودی پرو لیگ دے فٹ بال دے تِن میچ وی ملتوی کیتے جا چکے نیں، جنہاں وچ کرسٹیانو رونالڈو دی ٹیم النصر دا میچ وی شامل سی۔
دوجے پاسے، بین الاقوامی مالیاتی فنڈ (آئی ایم ایف) دی سربراہ کرسٹالینا جارجیوا نے خبردار کیتا اے کہ سعودی عرب اُتے حالیہ حملیاں دے اثرات پوری دنیا وچ محسوس کیتے جا سکدے نیں، کیوں جو تیل دیاں قیمتاں تے توانائی دے اخراجات ودھن نال عالمی معیشت متاثر ہون دا خدشہ اے۔
دوجے پاسے، سعودی قیادت وچ قائم فوجی اتحاد نے مغربی یمن وچ تیل دیاں تنصیبات اُتے حملے کیتے۔ اتحاد دے ترجمان ترکی المالکی نے آکھیا کہ انہاں کارروائیاں دا نشانہ اوہ تنصیبات سن، جنہاں نوں حوثی باغی سعودی عرب، یمن، بحیرۂ احمر دے جنوبی حصے تے اہم سمندری راستیاں لئی خطرہ پیدا کرن دی غرض نال استعمال کر رہے سن۔
ایندھن دی قلت دے خدشے دے پیشِ نظر صنعا وچ شہریاں دی وڈی تعداد پٹرول پمپاں اُتے قطاراں وچ کھڑی ویکھی گئی۔ یمنی حکومت نے حوثی باغیاں ولوں چینی ٹیکنالوجی ورت کے ہتھیار تیار کرن دیاں مبینہ کوششاں بارے بیجنگ نال گل بات کیتی اے۔ یمنی وزیر خارجہ افراح نے بدھ نوں دسیا کہ چین نے ایس معاملے دی تحقیقات لئی معلومات حاصل کرن وچ دلچسپی ظاہر کیتی اے۔
