آئینی عدالت ولوں بشریٰ بی بی دی سزا معطلی دی درخواست مسترد

سزا معطلی اُتے وکھری غور دی بجائے مرکزی اپیل دا جلد فیصلہ زیادہ مناسب راستہ اے، ہائی کورٹ توں غیر ضروری التوا دی حوصلہ شکنی دی توقع: تفصیلی فیصلہ، اپیل خارج

اسلام آباد (کورٹ رپورٹر) — وفاقی آئینی عدالت نے قرار دِتا اے کہ جے مرکزی اپیل زیرِ سماعت ہووے تاں سزا معطلی دی بجائے اپیل دا جلد فیصلہ کرن نوں ترجیح دِتی جانی چاہیدی اے۔ جدوں کسے مقدمے دی مرکزی اپیل پہلے ہی سماعت لئی مقرر ہووے، تاں سزا معطلی دے معاملے اُتے نال نال غور کرن دی بجائے مرکزی اپیل دا جلد فیصلہ کرنا زیادہ مناسب راستہ اے۔

عدالت نے بشریٰ بی بی دی سزا معطلی دی درخواست مسترد کرن دے اسلام آباد ہائی کورٹ دے حکم دے خلاف اپیل خارج کر دِتی۔

چیف جسٹس امین الدین خان تے جسٹس علی باقر نجفی اُتے مشتمل دو رکنی بینچ نے تفصیلی تحریری فیصلہ جاری کردیاں امید ظاہر کیتی کہ اسلام آباد ہائی کورٹ مرکزی اپیل دا فیصلہ کردیاں دوناں دھراں نوں سماعت دا مناسب موقع فراہم کرے گی تے غیر ضروری التوا دی حوصلہ شکنی کرے گی۔

عدالت نے اپیل دائر کرن وچ 61 دناں دی تاخیر معاف کردیاں قرار دِتا کہ اڈیالہ جیل وچ قید ہون بارے بشریٰ بی بی دی وضاحت تاخیر معاف کرن لئی کافی اے۔

فیصلے دے مطابق بشریٰ بی بی نے اسلام آباد ہائی کورٹ دا 30 اپریل 2026 دا حکم وفاقی آئینی عدالت وچ چیلنج کیتا سی، جس دے ذریعے احتساب عدالت دی 17 جنوری 2025 نوں سنائی گئی سزا معطل کرن دی درخواست مسترد کر دِتی گئی سی۔

آئینی عدالت نے قرار دِتا کہ صرف مرکزی اپیل وچ وڈے ریکارڈ تے تفصیلی دلائلاں دی لوڑ ہونا، سزا معطلی دی درخواست مسترد کرن والے حکم وچ مداخلت لئی کافی جواز نئیں۔

عدالت نے آکھیا کہ وکیل نوں مرکزی اپیل دی سماعت دوران مکمل معاونت کرنی چاہیدی اے، جدکہ قومی احتساب بیورو (نیب) نوں وی غیر ضروری التوا منگے بغیر اپنے دلائل پیش کرنے چاہیدے نیں۔