وزارتِ خارجہ نے دستاویزاں دی تصدیق لئی ڈیجیٹل نظام متعارف کروا دِتا
ہُن شہری گھر بیٹھے آن لائن درخواست دے سکن گے، فیس دی ادائیگی توں بعد ای سرٹیفکیٹ ای میل اُتے موصول ہووے گا
ایس اقدام نال تصدیق دا عمل تیز ہووے گا، شہریاں نوں دفاتراں دے چکر لاؤن تے لمیاں قطاراں وچ انتظار کرن دی لوڑ نہیں پئے گی۔
اسلام آباد (حریم جدون) — وزارتِ خارجہ نے شہریاں دی سہولت لئی دستاویزاں دی تصدیق دا مکمل ڈیجیٹل نظام متعارف کروا دِتا اے، جس دے تحت شہری ہُن گھر بیٹھے آن لائن درخواست دے سکن گے تے تصدیق دا عمل مکمل ہون اُتے ای سرٹیفکیٹ وی ای میل دے ذریعے موصول ہووے گا۔
نویں نظام دے تحت شہریاں نوں دستاویزاں دی تصدیق لئی وزارتِ خارجہ دے دفاتراں دے بار بار چکر لاؤن تے لمیاں قطاراں وچ انتظار کرن دی لوڑ نہیں رہے گی۔ شہری آن لائن درخواست جمع کراؤن توں بعد اپنی دستاویزاں دی جانچ پڑتال تے تصدیق دے عمل بارے معلومات حاصل کر سکن گے۔
وزارتِ خارجہ دے مطابق دستاویزاں دی جانچ پڑتال تے تصدیق مکمل ہون توں بعد شہریاں نوں فیس آن لائن جمع کراؤن دی سہولت دِتی جاوے گی۔ فیس دی ادائیگی توں بعد ای سرٹیفکیٹ شہری دے دِتے گئے ای میل پتے اُتے جاری کر دِتا جاوے گا۔
ڈیجیٹل نظام دے ذریعے دستاویزاں دی تصدیق دے عمل نوں تیز، آسان تے شفاف بناؤن وچ مدد ملے گی۔ وزارتِ خارجہ ولوں ڈیجیٹل نظام متعارف کراؤن دا ایہ اقدام سرکاری خدمتاں نوں جدید خطوط اُتے استوار کرن تے شہریاں نوں گھر بیٹھے سہولتاں فراہم کرن ول اک اہم پیش رفت اے۔
