جڑواں شہراں وچ طوفانی میہہ، سردی شروع

سڑکاں تالاب بن گئیاں، لوکاں نوں مشکلات، اج وی میہہ تے گڑیاں ورگے اولے پین دا امکان

اسلام آباد (اے پی پی) اسلام آباد تے راولپنڈی وچ گزشتہ رات گرج چمک نال طوفانی میہہ پیا تے اولے وی پئے، جس دی وجہ نال سڑکاں اُتے پانی کھلوتا ہو گیا تے لوکاں نوں مشکلات دا سامنا کرنا پیا۔ جڑواں شہراں وچ رات دے ویلے سردی وی ودھ گئی، جس کرکے لوکاں نے گرم کپڑے کڈھ لَئے۔

اج وی جڑواں شہراں، مری، کشمیر، خیبر پختونخوا تے گلگت بلتستان وچ تیز ہواؤں، جھکڑاں تے گرج چمک نال میہہ تے اولے پین دا امکان اے۔

پچھلے 24 گھنٹیاں دوران خیبر پختونخوا، گلگت بلتستان، کشمیر تے خطہ پوٹھوہار دے کجھ مقامات اُتے گرج چمک نال میہہ پیا۔

سب توں ودھ میہہ خیبر پختونخوا دے مختلف علاقیاں وچ ریکارڈ کیتا گیا۔ کالام وچ 27، مالم جبہ وچ 16، سیدو شریف وچ 15، دروش وچ 14، دیر وچ 8، میر کھانی وچ 11، بالاکوٹ وچ 10 تے پٹن تے چترال وچ 9 ملی میٹر میہہ ریکارڈ ہویا۔

گلگت بلتستان وچ استور وچ 15، بابوسر وچ 9 تے سکردو وچ 8 ملی میٹر، جدکہ مری وچ 3 ملی میٹر میہہ ریکارڈ کیتا گیا۔

پشاور وچ تیز میہہ تے اولے پین دے امکان دے پیشِ نظر ریسکیو 1122 نوں الرٹ کر دِتا گیا اے۔