خطے وچ کشیدگی گھٹاؤن لئی مذاکرات ناگزیر نیں: اسحاق ڈار
عمانی وزیرِ خارجہ نال مشترکہ پریس کانفرنس، سعودی عرب دی سلامتی دے تحفظ دا عزم، ایسی شراکت داری نوں اگے ودھاؤں گے جو دوناں ملکاں دیاں امنگاں اُتے پوری اُترے: البوسعیدی
اسلام آباد (وقائع نگار) نائب وزیراعظم اسحاق ڈار نے پاکستان تے عمان دے درمیان مختلف شعبیاں وچ دوطرفہ تعاون نوں ہور مضبوط بناؤن دے عزم دا اعادہ کردیاں آکھیا کہ اسیں دوناں ملکاں دی کاروباری برادریاں دے درمیان قریبی رابطیاں دا خیرمقدم کردے آں تے خصوصی اقتصادی زونز تے آزاد تجارتی زونز وچ ودھ سرمایہ کاری دی حوصلہ افزائی کردے آں۔
اُنہاں آکھیا کہ مکہ مشترکہ دفاعی معاہدے دے مطابق سعودی عرب دی خودمختاری، علاقائی سالمیت تے سلامتی دے تحفظ لئی پاکستان دے غیر متزلزل عزم دا اعادہ کردے آں۔ خطے وچ تناؤ دی بجائے کشیدگی گھٹاؤن، مذاکرات تے سفارت کاری ناگزیر نیں۔ آبنائے ہرمز تے باب المندب دے ذریعے جہاز رانی دی سلامتی تے آزادی یقینی بناؤن دی وی لوڑ اے۔
اِنہاں خیالات دا اظہار اُنہاں سلطنتِ عمان دے وزیرِ خارجہ سید بدر بن حمد بن حمود البوسعیدی دے نال مشترکہ پریس کانفرنس دوران کیتا۔
اُنہاں آکھیا کہ سلطنتِ عمان دے وزیرِ خارجہ تے اُنہاں دے نال آئے وفد دی پاکستان آمد اُتے سانوں بے حد خوشی ہوئی اے۔ ایہہ دورہ پاکستان تے عمان دے مشترکہ وزارتی کمیشن دے اَٹھویں اجلاس دے سلسلے وچ ہویا، جیہڑا ہُن نہایت کامیابی نال مکمل ہو چکیا اے۔
اُنہاں آکھیا کہ عمان دے وزیرِ خارجہ دے نال ایس اجلاس دی مشترکہ صدارت کرن دا اعزاز حاصل ہویا۔ ساڈی گل بات دوستانہ تے تعمیری ماحول وچ ہوئی، جیہڑی پاکستان تے عمان دے درمیان گہری دوستی، باہمی اعتماد تے برادرانہ تعلقات دی عکاسی کردی اے۔
نائب وزیراعظم نے آکھیا کہ اسیں مختلف شعبیاں وچ دوطرفہ تعاون نوں ہور مضبوط بناؤن دے اپنے مشترکہ عزم دا اعادہ کیتا اے۔
اُنہاں آکھیا کہ اج اسیں پاکستان تے عمان دے مشترکہ وزارتی کمیشن دے اَٹھویں اجلاس دے پروٹوکول اُتے دستخط کراں گے۔ ایہہ پروٹوکول باہمی دلچسپی دے شعبیاں وچ دوطرفہ تعاون نوں ہور مضبوط تے وسیع کرن دے ساڈے مشترکہ عزم دی عکاسی کردا اے۔ اسیں سفارتی، خصوصی سروس تے سرکاری پاسپورٹ رکھن والیاں لئی باہمی ویزا چھوٹ دے معاہدے اُتے وی دستخط کراں گے۔
اسحاق ڈار نے آکھیا کہ اسیں فلسطین دی سنگین صورتحال اُتے وی تبادلۂ خیال کیتا اے تے فلسطینی عوام تے اُنہاں دے ناقابلِ تنسیخ حقاں لئی پاکستان دی اصولی تے غیر متزلزل حمایت دا اعادہ کیتا اے۔
اُنہاں آکھیا کہ اسیں افغانستان دی صورتحال تے سندھ طاس معاہدے سمیت علاقائی پیش رفت اُتے وی گل بات کیتی۔ پاکستان نے ایس گل اُتے زور دِتا کہ افغان سرزمین نوں پاکستان دے خلاف کسے وی سرگرمی لئی استعمال نہیں ہونا چاہیدا۔
سندھ طاس معاہدے بارے گل کردیاں اُنہاں آکھیا کہ بھارت ولوں یکطرفہ طور اُتے ایس معاہدے نوں معطل رکھن دا فیصلہ بین الاقوامی قانون دی سنگین خلاف ورزی اے۔
سید بدر بن حمد بن حمود البوسعیدی نے گل بات کردیاں آکھیا کہ اسحاق ڈار نال ملاقات دوران دوناں ملکاں دے درمیان دیرینہ تعلقات دی مضبوطی دا اعادہ کیتا گیا۔ ایہہ تعلقات مشترکہ تاریخ، جغرافیائی قربت، باہمی احترام تے دوناں ملکاں دے عوام دے درمیان ودھدے تے پائیدار رابطیاں اُتے مبنی نیں۔
اُنہاں آکھیا کہ دوناں دھراں نے ایس مضبوط بنیاد نوں ہور مستحکم کرن تے ایسی شراکت داری نوں اگے ودھاؤن دے عزم اُتے زور دِتا، جیہڑی دوناں ملکاں دیاں امنگاں تے ترجیحات اُتے پوری اُترے۔
