آئینی عدالت: پی پی ایس سی دے کامیاب 123 امیدوار بحال
پرچے امتحان توں بعد برآمد ہوئے، نہ شوکاز نوٹس دِتا گیا تے نہ موقف سُنیا گیا: کمیشن دا مؤقف مسترد، رسک الاؤنس عملی پولیس ڈیوٹی کرن والیاں دا حق: فیصلہ، درخواست خارج
اسلام آباد (حسیب ریاض ملک) وفاقی آئینی عدالت نے پنجاب پبلک سروس کمیشن دے تحت امتحاناں وچ کامیاب 123 امیدواراں دیاں درخواستاں منظور کردیاں اُنہاں دی حیثیت بحال کر دِتی تے کمیشن دا مؤقف مسترد کر دِتا۔
چیف جسٹس امین الدین خان دی سربراہی وچ دو رکنی بینچ نے کیس دی سماعت کیتی۔ جسٹس علی باقر نجفی نے ریمارکس دِتے کہ پرچے لیک ہون دا معاملہ امیدواراں دے امتحان پاس کرن تے پنجاب پبلک سروس کمیشن دیاں سفارشاں جاری ہون توں بعد سامنے آیا سی۔ ملازمت توں فارغ کرن توں پہلاں نہ تاں امیدواراں نوں شوکاز نوٹس جاری کیتے گئے تے نہ ہی اُنہاں دا موقف سُنیا گیا۔
دوجے پاسے، وفاقی آئینی عدالت نے قرار دِتا کہ رسک الاؤنس دا حق صرف اُن وردی پوش پولیس اہلکاراں نوں حاصل اے، جیہڑے فعال تے عملی پولیس ڈیوٹی انجام دیندے نیں۔
عدالت نے خیبر پختونخوا پولیس دے انتظامی عملے نوں رسک الاؤنس دین بارے پشاور ہائی کورٹ دا فیصلہ کالعدم قرار دیندیاں متعلقہ ملازماں دی درخواست خارج کر دِتی۔
