این ایچ اے ولوں این فائیو شاہراہ دی صفائی دا کم ایل ڈبلیو ایم سی دے حوالے
ٹھوکر نیاز بیگ توں رنگ روڈ انٹرچینج تک صفائی دا ماہانہ خرچ 45 لکھ 68 ہزار روپے مقرر
اسلام آباد (ایس ایم زمان) نیشنل ہائی وے اتھارٹی (این ایچ اے) نے لاہور وچ ٹھوکر نیاز بیگ توں رنگ روڈ انٹرچینج تک این فائیو شاہراہ دی صفائی دا کم لاہور ویسٹ مینجمنٹ کمپنی (ایل ڈبلیو ایم سی) نوں سونپݨ دی منظوری دے دتی اے۔
این ایچ اے دے مطابق ایہ معاہدہ حکومت نال حکومت (جی ٹو جی) دی بنیاد اُتے پبلک پروکیورمنٹ ریگولیٹری اتھارٹی (پیپرا) دے قوانین دی شق 42(ایف) دے تحت براہِ راست ٹھیکہ دین دے ذریعے کیتا جاوے گا۔
معاہدے دی مدت 12 مہینے ہووے گی، جدکہ ماہانہ خرچ 45 لکھ 68 ہزار 683 روپے تے سالانہ خرچ 5 کروڑ 48 لکھ 24 ہزار 196 روپے مقرر کیتا گیا اے۔
این ایچ اے نے منصوبے اُتے عمل درآمد دی ذمہ داری ممبر سینٹرل زون نوں سونپ دتی اے۔
