حافظ نعیم: اشرافیہ نے پورے معاشرے نوں یرغمال بنا رکھیا اے
حافظ نعیم: اشرافیہ نے پورے معاشرے نوں یرغمال بنا رکھیا اے
ریاست اپنی ذمے واری پوری نہیں کر رہی، ملک دا تعلیمی نظام جدید تقاضیاں دے مطابق نہیں، اوہناں لوکاں توں وی ٹیکس لیا جاندا اے جنہاں دی کوئی آمدن نہیں: خطاب
گجرات امیر جماعت اسلامی حافظ نعیم الرحمٰن نے آکھیا اے کہ ساڈے ملک وچ ریاست اپنی ذمے واری پوری نہیں کر رہی، اشرافیہ نے پورے معاشرے نوں یرغمال بنا رکھیا اے تے وڈے وڈے سرمایہ دار غریباں دا استحصال کر رہے نیں۔
گجرات وچ الخدمت فاؤنڈیشن دے بنو قابل پروگرام دی پہلی گریجویشن تقریب نوں خطاب کردیاں انہاں آکھیا کہ پاکستان وچ بیوروکریسی تے جاگیرداراں اُتے مشتمل اشرافیہ موجود اے۔ زراعت، معیشت سمیت ہر چیز اشرافیہ دے کنٹرول وچ اے۔
افسوس دی گل اے کہ ساڈے ملک دا تعلیمی نظام جدید تقاضیاں دے مطابق نہیں۔ پاکستان وچ ایس ویلے پونے تین کروڑ توں ودھ بچے سکولاں توں باہر نیں۔ صرف پنجاب وچ اک کروڑ 18 لاکھ بچے سکول نہیں جا رہے، جدکہ صوبے دے 70 فیصد سرکاری سکولاں وچ واش رومز دیاں سہولتاں موجود نہیں نیں۔
پنجاب وچ نویں جماعت دے 52 فیصد طالب علم فیل ہو گئے۔ سندھ دے سکولاں دی حالت ایس توں وی مَڑی اے۔ صرف اشتہارات وچ پنجاب دی ترقی دکھائی جاندی اے۔ حافظ نعیم نے دعویٰ کیتا کہ مریم نواز نے 11 ہزار سکول وِچ دتے نیں، جدکہ ہدف 25 ہزار سکول وِچن دا اے۔
انہاں آکھیا کہ پاکستان وچ حقیقی مسئلیاں اُتے کوئی وی سیاست نہیں کردا۔ تعلیم تے مہنگائی دے مسئلے اُتے کوئی سیاسی جماعت سڑکاں اُتے نہیں نکلدی۔ زراعت تباہ ہو رہی اے، عوام مشکلات دا شکار نیں، پر کسے نوں فکر ہی نہیں۔
حافظ نعیم نے آکھیا کہ ایتھے اوہناں لوکاں توں وی ٹیکس لیا جاندا اے جنہاں دی کوئی آمدن نہیں ہوندی۔ ایہ غریباں تے مڈل کلاس طبقے دا استحصال اے۔ ملک وچ مفت تعلیم تاں اک پاسے، مہنگی تعلیم وی معیاری نہیں مل رہی۔
