مالدیپ دے صدر دا 11 سال بعد پاکستان دا پہلا دورہ کل شروع
محمد معیزو پاکستانی ہم منصب آصف علی زرداری تے وزیراعظم شہباز شریف نال ملاقاتاں کرن گے، مختلف شعبیاں نال متعلق کئی معاہدیاں تے مفاہمتی یادداشتاں اُتے دستخط ہون دی توقع
اسلام آباد (وقائع نگار، دنیا نیوز، مانیٹرنگ ڈیسک) ترجمان دفتر خارجہ دے مطابق مالدیپ دے صدر محمد معیزو دوطرفہ تعلقات نوں مضبوط بناؤن لئی اپنے پہلے سرکاری دورے اُتے کل 20 اکتوبر نوں پاکستان آؤن گے۔
وزیراعظم شہباز شریف دی دعوت اُتے تین روزہ سرکاری دورے دوران مالدیپ دے صدر دے نال خاتونِ اول، کابینہ دے وزیراں تے اعلیٰ حکام اُتے مشتمل اک اعلیٰ سطح دا وفد وی آوے گا۔
دفتر خارجہ دے مطابق محمد معیزو 20 اکتوبر توں 22 اکتوبر تک پاکستان دے دورے دوران اپنے پاکستانی ہم منصب آصف علی زرداری نال ملاقات کرن گے، جدوں کہ وزیراعظم شہباز شریف نال محدود سطح تے وفود دی سطح اُتے مذاکرات وی کرن گے۔
ایس دورے دوران پاکستان مالدیپ بزنس فورم دا انعقاد وی کیتا جاوے گا۔ تجارت، سرمایہ کاری، صحت، تعلیم، سیاحت، زراعت، دفاع تے بحری سلامتی دے شعبیاں اُتے گل بات ہووے گی۔ مختلف شعبیاں نال متعلق کئی معاہدیاں تے مفاہمتی یادداشتاں اُتے دستخط کیتے جان دی وی توقع اے۔
ترجمان دے مطابق مالدیپ دے کسے صدر دا گیارہ سال بعد پاکستان دا ایہہ پہلا سرکاری دورہ ہووے گا۔ ایہہ دورہ ایس لئی وی خاص اہمیت رکھدا اے کہ دونے ملک 1966 وچ سفارتی تعلقات قائم ہون دی 60ویں سالگرہ منا رہے نیں۔
