غیر ملکی امدادی منصوبیاں وچ بغیر ثبوت پیرا بنانے اُتے آڈٹ ٹیم تے افسران ذمہ دار
غیر ملکی امدادی منصوبیاں وچ بغیر ثبوت آڈٹ پیرا بناؤن اُتے آڈٹ ٹیم تے افسران ذمہ دار
آڈٹ رپورٹاں وچ غیر جانبدار عنوان، مستند ثبوت تے پچھلے اعتراضات اُتے عمل درآمد دیاں تفصیلات شامل کرنا لازمی قرار
رپورٹاں تیار کردیاں موقعے اُتے جا کے تصدیق تے نتائج شامل کرنا ضروری ہووے گا، آڈیٹر جنرل ولوں نویاں پالیسی گائیڈ لائنز جاری
اسلام آباد (ایس ایم زمان) آڈیٹر جنرل پاکستان نے غیر ملکی امدادی منصوبیاں دے آڈٹ دے حوالے نال نویاں پالیسی گائیڈ لائنز جاری کر دتیاں نیں۔ ہدایتاں دے مطابق سارے غیر ملکی امدادی منصوبیاں دیاں آڈٹ رپورٹاں متعلقہ ڈونر ایجنسیاں دیاں خاص لوڑاں تے پچھلے طریقۂ کار دے مطابق تیار کیتیاں جان گیاں، تاہم سالانہ آڈٹ پلان وچ شامل منظور شدہ منصوبیاں دیاں رپورٹاں مقررہ مدت وچ ’پراجیکٹ رپورٹ ٹیمپلیٹ‘ دے مطابق تیار کرنا لازمی ہووے گا۔
نویں پالیسی دے تحت آڈٹ لئی متعلقہ ریکارڈ، دستاویزات تے قابلِ تصدیق ثبوتاں دی موجودگی لازمی قرار دتی گئی اے، تاکہ ہر مرحلے اُتے آڈٹ دی ساکھ برقرار رہے۔ مینجمنٹ لیٹر وچ آڈٹ دے عنوان غیر جانبدار تے معروضی رکھے جان گے۔ سنسنی خیز عنوانات تے ’فراڈ‘ یا ’غلط استعمال‘ ورگے لفظاں توں گریز کرن دی ہدایت دتی گئی اے۔ عنوانات وچ مالی رقم دا ذکر نئیں ہووے گا، البتہ ایس دیاں تفصیلات متن وچ دتیاں جا سکدیاں نیں۔
غیر مصدقہ، بغیر ثبوت یا اندازیاں دی بنیاد اُتے آڈٹ پیرا تیار کرن دی صورت وچ آڈٹ ٹیم، نگران افسر تے ڈائریکٹر جنرل (ڈی جی) ذمہ دار ہون گے۔
آڈٹ رپورٹاں وچ پچھلے آڈٹ پیراواں اُتے عمل درآمد تے فالو اَپ لئی اک مخصوص کالم شامل کیتا جاوے گا، جس وچ ڈونر ایجنسیاں دے مطابق پچھلے پیراواں تے انہاں اُتے انتظامی کارروائی دیاں تفصیلات جدول دی صورت وچ درج ہوون گیاں۔
پراجیکٹ دے اثاثیاں دا جائزہ وی آڈٹ رپورٹ دا لازمی حصہ ہووے گا۔ ایس وچ اثاثیاں دی جسمانی موجودگی، حالت، رجسٹر، دیکھ بھال، محفوظ تحویل، استعمال، مالیت دی تصدیق تے غیر محسوس اثاثیاں دیاں تفصیلات شامل کیتیاں جان گیاں۔
آڈٹ رپورٹاں وچ منصوبیاں دے ملازماں دی تعداد، سالانہ آڈٹ پلان، سال دوران تیار کیتیاں رپورٹاں، سفارشات اُتے عمل درآمد دی صورتحال تے پراجیکٹ مینجمنٹ بورڈ دے سامنے رپورٹاں پیش کرن دی پیش رفت دا احاطہ کرنا وی ضروری ہووے گا۔
رپورٹاں تیار کرن دوران موقعے اُتے جا کے تصدیق کرنا تے نتائج شامل کرنا لازمی ہووے گا۔ ڈائریکٹنگ آڈٹ گروپاں تے فیلڈ آڈٹ دفتراں نوں انہاں ہدایتاں اُتے عمل درآمد دی ہدایت کیتی گئی اے۔
سپیشل سیکٹر آڈٹ ونگ نوں پابند کیتا گیا اے کہ اوہ اکنامک افیئرز ڈویژن نوں رپورٹاں بھجوان توں پہلاں سارے نکات تے پالیسی اُتے عمل درآمد دی جانچ کرے۔
