کجھ افسران دی پاکستان نال وابستگی دا جائزہ لینا چاہیدا اے: خواجہ آصف
وڈی گنتی وچ افسر کئی سالاں توں کینیڈا، یورپ تے امریکہ وچ مستقل منتقل ہو چکے نیں، کی انہاں دی ملک نال وابستگی نوں شک تے شبہے توں بالاتر سمجھیا جا سکدا اے؟: خواجہ آصف
اسلام آباد (دنیا نیوز) وفاقی وزیرِ دفاع خواجہ آصف نے سرکاری بیوروکریسی دے کجھ افسران ولوں بیرونِ ملک مستقل رہائش اختیار کرن دیاں تیاریواں اُتے سوال چُکدیاں آکھیا اے کہ اعلیٰ عہدیاں اُتے فائز رہن، حکومتی سرپرستی حاصل کرن تے ملک توں عزت تے مراعات لین والے افسران دی پاکستان نال وابستگی دا جائزہ لیا جانا چاہیدا اے۔
سماجی رابطے دی ویب سائٹ ’ایکس‘ اُتے اپنے بیان وچ خواجہ آصف نے آکھیا کہ پاکستان دی بیوروکریسی دے وڈی گنتی وچ افسر پچھلے کئی سالاں توں کینیڈا، امریکہ، برطانیہ تے یورپ نوں اپنا مستقل ٹھکانہ بنا چکے نیں۔ کجھ افسران نے سرکاری ملازمت دوران ہی بیرونِ ملک مستقل رہائش اختیار کرن لئی باقاعدہ منصوبہ بندی کیتی، جس نال ملازمت دوران وطن تے سرکاری ذمہ واریاں نال انہاں دی وابستگی بارے سوال پیدا ہوندے نیں۔
وفاقی وزیرِ دفاع نے آکھیا کہ پچھلے کجھ سالاں توں سرکاری افسران دی بیرونِ ملک منتقلی دے معاملے وچ پرتگال دا ناں سامنے آ رہیا اے۔ اوہ کجھ مہینے پہلاں وی ایس موضوع اُتے ایکس اُتے بیان دے چکے نیں۔ ایس سلسلے وچ جنہاں افسران دے ناں سامنے آ رہے نیں، اوہ کئی سالاں توں مختلف حکومتاں دی توجہ تے سرپرستی حاصل کردے رہے نیں تے اہم عہدیاں اُتے فائز نیں۔
اوہناں نے ایہہ دعویٰ وی کیتا کہ مستقل رہائش (پی آر) حاصل کرن وچ مبینہ سہولت کاری کرن والا اک شخص کئی امیر بیوروکریٹس توں وڈیاں رقماں وصول کرن توں بعد فرار اے۔
وفاقی وزیرِ دفاع نے سوال چُکیا کہ کی افسران دی ملک نال وابستگی نوں ملازمت دے پورے عرصے دوران شک تے شبہے توں بالاتر سمجھیا جا سکدا اے؟ کی ایسے افسران اپنی سرکاری ملازمت دوران پاکستان نال مستقل وابستگی رکھدے نیں یا انہاں وچوں کجھ مستقبل وچ بیرونِ ملک منتقل ہون دے منصوبیاں تحت صرف عارضی طور اُتے ایتھے خدمات انجام دیندے نیں؟
