فیلڈ مارشل نال سعودی سفیر دی ملاقات، مکہ معاہدے اُتے اطمینان دا اظہار
دوناں ملکاں وچ دفاعی تعاون تے سٹریٹجک ہم آہنگی نوں ہور مضبوط بناؤن اُتے زور، راجح بن طامی دی تعیناتی تعلقات دے فروغ وچ مددگار ثابت ہووے گی: عاصم منیر
راولپنڈی (خصوصی نیوز رپورٹر) چیف آف ڈیفنس فورسز فیلڈ مارشل سید عاصم منیر نال پاکستان وچ نویں تعینات ہون والے سعودی سفیر ڈاکٹر راجح بن طامی البقمی نے جنرل ہیڈکوارٹرز (جی ایچ کیو) راولپنڈی وچ ملاقات کیتی۔
پاک فوج دے شعبۂ تعلقاتِ عامہ (آئی ایس پی آر) دے مطابق، ملاقات دوران باہمی دلچسپی دے معاملے تے خطے دی سکیورٹی دی صورتحال اُتے تبادلۂ خیال کیتا گیا۔
دونواں شخصیات نے مکہ مشترکہ دفاعی معاہدے دے فریم ورک تحت ہون والی پیش رفت اُتے اطمینان دا اظہار کیتا تے دفاعی تعاون، ادارہ جاتی رابطیاں تے سٹریٹجک ہم آہنگی نوں ہور مضبوط بناؤن دی اہمیت اُتے زور دتا۔
ایس موقعے اُتے فیلڈ مارشل سید عاصم منیر نے سعودی سفیر نوں نویاں ذمہ واریاں سنبھالن اُتے مبارک باد دتی تے ایہ اعتماد ظاہر کیتا کہ اُنہاں دی تعیناتی پاکستان تے مملکتِ سعودی عرب دے درمیان دیرینہ برادرانہ تعلقات نوں ہور فروغ دین وچ مددگار ثابت ہووے گی۔
ملاقات دوران ایس گل اُتے زور دتا گیا کہ پاکستان تے سعودی عرب دے تعلقات مشترکہ دینی قدراں، باہمی اعتماد تے سٹریٹجک شراکت داری اُتے قائم نیں، جیہڑے دوناں ملکاں دے درمیان مضبوط تے دیرپا تعلقات دی بنیاد نیں۔
