مریم نواز دی صدارت ہیٹھ کابینہ دا اجلاس، صنعتی ترقی سمیت کئی منصوبیاں دی منظوری
مریم نواز دی صدارت ہیٹھ کابینہ دا اجلاس، صنعتی ترقی سمیت کئی منصوبیاں دی منظوری
پیوٹ پروگرام پیش، 1995 ارب روپے دی سرمایہ کاری، ڈیڑھ لکھ توں ودھ لوکاں لئی روزگار دے موقعے پیدا ہون گے: بریفنگ
لاہور وچ دنیا دا سب توں وڈا نواز شریف کینسر ہسپتال بنا رہے آں: وزیراعلیٰ، بریسٹ کینسر بارے آگاہی دے عالمی دن اُتے پیغام
لاہور (سٹاف رپورٹر، مانیٹرنگ ڈیسک) وزیراعلیٰ پنجاب مریم نواز دی صدارت ہیٹھ پنجاب کابینہ دا 37واں اجلاس ہویا۔ اجلاس دوران دہشت گرداں خلاف کارروائی وچ جامِ شہادت نوش کرن والے افسران تے جواناں دے درجات دی بلندی لئی دعا کیتی گئی۔
صوبائی کابینہ نے صنعتی ترقی تے برآمدات دے پروگرام دی سکیم دیاں خصوصیات دی منظوری دے دتی۔ اجلاس وچ سینئر وزیر مریم اورنگزیب نے پنجاب وچ پیوٹ پروگرام پیش کیتا۔
پیوٹ پروگرام وچ صنعتی بنیادی ڈھانچے تے کلسٹر ڈویلپمنٹ، مسابقتی برآمدات، ویلیو چین وچ تبدیلی، زراعت تے لائیوسٹاک وچ ای میکانائزیشن تے سرکاری تے نجی شعبے دی شراکت داری نوں شامل کیتا گیا اے۔
پیوٹ پروگرام دے ذریعے پنجاب وچ 1995 ارب روپے دی سرمایہ کاری متوقع اے، جس وچ 1089 ارب روپے سرکاری تے 906 ارب روپے نجی سرمایہ کاری شامل اے۔ ایس پروگرام نال اک لکھ 62 ہزار توں ودھ افراد لئی روزگار دے موقعے پیدا ہون گے۔
اجلاس نوں بریفنگ دوران ہور دسیا گیا کہ پیوٹ پروگرام وچ موجودہ صنعتاں دی سہولت کاری، کلسٹر انفراسٹرکچر دی ترقی، ای بزنس، ای کامرس، گارمنٹس، پلگ اینڈ پلے، لیدر اینڈ فٹ ویئر تے کھیل دے سامان دی جانچ تے سرٹیفکیشن نوں شامل کیتا گیا اے۔ سرگودھا، خانیوال، اوکاڑہ تے بھکر وچ زرعی پراسیسنگ پارک قائم کیتے جان گے۔
اجلاس وچ 20 ضلعیاں وچ ہارٹی کلچر اتھارٹی قائم کرن دی منظوری وی دتی گئی۔ چیف منسٹر پنجاب گرین ٹریکٹر پروگرام دے ہائی پاور فیز 5 لئی سبسڈی تے گرین ٹریکٹر سکیم دی رجسٹریشن اُتے لیٹ فیس معاف کرن دی منظوری دتی گئی۔
ایس توں علاوہ تھل وچ زرعی تبدیلی دے منصوبے لئی سبسڈی تے چیف منسٹر گرین ٹریکٹر پروگرام دے لوئر پاور فیز 4 لئی سبسڈی دی منظوری وی دتی گئی۔
وزیراعلیٰ مریم نواز شریف نے ہسپتالاں وچ طبی آلات نوں فعال کرن لئی ضروری واجبات فوری ادا کرن دا حکم دتا۔ صوبائی کابینہ نے سپیشل ہیلتھ کیئر اینڈ میڈیکل ایجوکیشن دے ضروری واجبات لئی فنڈز دی منظوری دتی۔
پنجاب رنگ روڈ اتھارٹی دے ٹریفک جرمانیاں وچ ترمیم دی منظوری وی دتی گئی۔ اجلاس نوں دسیا گیا کہ تیز رفتاری، اوورلوڈنگ، پیدل لنگھن دے مقامات تے خلاف ورزیاں سمیت ہور ٹریفک قوانین دی خلاف ورزی اُتے جرمانے کئی گنا ودھا دتے گئے نیں۔
اجلاس دوران وزیراعلیٰ مریم نواز نے اپنی چھت، اپنا گھر سکیم وچ سٹیمپ ڈیوٹی لاون دی تجویز مسترد کر دتی۔
صوبائی کابینہ نے گلگت بلتستان نوں 6 کلینک آن ویلز گاڑیاں تے آزاد جموں و کشمیر نوں 15 کلینک آن ویلز گاڑیاں عطیہ کرن دی منظوری دتی۔ ستھرا پنجاب اتھارٹی تے ایجنسی دیاں 219 تے 3704 آسامیوں اُتے بھرتی دی پابندی وچ نرمی، پنجاب سوشل پروٹیکشن اتھارٹی دیاں 17 خالی آسامیوں اُتے بھرتی تے گلوبل انویسٹمنٹ گیٹ وے آف پنجاب ونگ لئی خصوصی بھرتی کمیٹی قائم کرن دی منظوری وی دتی گئی۔
ڈی جی خان تے راجن پور دی بارڈر ملٹری پولیس تے بلوچ لیوی وچ بھرتیاں اُتے پابندی وچ نرمی دی منظوری وی اجلاس دا حصہ سی۔
اجلاس وچ فضائی معیار دی بہتری لئی الیکٹرک ٹرکاں تے اینٹی سموگ گنز دی فراہمی واسطے سالانہ ترقیاتی پروگرام دے منصوبے وچ ترمیم، کابینہ دے 36ویں اجلاس دی کارروائی دی توثیق، محکمہ خواندگی دے طبی اخراجات دی واپسی تے عدلیہ لئی گھراں دی تعمیر تے خریداری واسطے ہاؤس بلڈنگ اینڈ فنانس لون دی منظوری دتی گئی۔
محکمہ صحت تے آبادی دے معاملات، پینٹاویلنٹ پلس آئی پی وی ویکسین نوں ہیکساویلنٹ ویکسین وچ تبدیل کرن تے 2025 دے سیلابی امدادی آپریشنز دوران سول آرمڈ فورسز دی تعیناتی دی بعد از وقت منظوری وی دتی گئی۔
گوجر خان وچ پنجاب یونیورسٹی دے پوٹھوہار کیمپس دے قیام، لاہور ریلوے سٹیشن دی تزئین و آرائش تے اپ گریڈیشن لئی ایل ڈی اے نوں گرانٹ، ضابطۂ فوجداری 1898 تے آرمز آرڈیننس 1965 وچ ترامیم دی منظوری دتی گئی۔
اجلاس وچ فیصل آباد انڈسٹریل ایریا نوں ٹیکس توں استثنیٰ، پولیس ریکارڈ سرٹیفکیٹ جاری کرن دے قانونی طریقۂ کار، لکی سیمنٹ پلانٹاں دے قیام تے توسیع دے فریم ورک، پنجاب وچ دستیاب زرعی زمین دی مینجمنٹ سکیم تے پنجاب سرنڈر آف آرمز ایکٹ 2025 دی منظوری وی شامل سی۔
سپیشل ایجوکیشن تے پنجاب انفارمیشن ٹیکنالوجی دے درمیان سروس لیول معاہدے تے یونیورسٹی آف رسول منڈی بہاؤالدین ایکٹ 2018 وچ ترمیم کرکے یونیورسٹی نوں ملٹی ڈسپلنری یونیورسٹی بناؤن دی منظوری دتی گئی۔
پنجاب مائنز اینڈ منرلز ایکٹ 2026 تے پنجاب سینئر سٹیزن ویلفیئر ایکٹ 2026 دے تحت پنجاب سینئر سٹیزن کونسل قائم کرن دی منظوری دتی گئی۔ نئی بھرتیاں اُتے پابندی وچ نرمی، بیرونِ ملک پاکستانیوں دی جائیداد دے قانون 2025 دے تحت جوڈیشل افسر نامزد کرن تے میانوالی وچ مریم نواز میڈیکل کالج تے ٹیچنگ ہسپتال قائم کرن دے معاملات وی زیرِ غور آئے۔
پنجاب مینجمنٹ سروس (پی ایم ایس) دے امتحاناں لئی عمر دی حد تے امتحان دین دے موقعیاں وچ اضافے دی عارضی منظوری دتی گئی۔ پبلک سیکٹر میڈیکل یونیورسٹیز آرڈیننس 2026 وی منظور کر لیا گیا۔
لاہور ہائی کورٹ دے نویں بلاک لئی آلات خریدن واسطے ساڑھے 16 کروڑ روپے دے اضافی فنڈز، پنجاب لوکل گورنمنٹ ایکٹ 2025 دے تحت ایڈمنسٹریٹر دی تعیناتی تے سرکاری سکولاں وچ سکول ٹیچنگ انٹرنز (ایس ٹی آئیز) بھرتی کرن دی منظوری دتی گئی۔
پنجاب لوکل گورنمنٹ ایکٹ 2025 دے تحت یونین کونسلز دے ناں مخصوص کرن، سزا دوران تعلیم حاصل کرن والے قیدیاں نوں خصوصی رعایت دین لئی پاکستان پریزن رولز 1978 وچ ترمیم تے مریم نواز سوشل سکیورٹی راشن کارڈ سکیم جاری رکھن دی منظوری دتی گئی۔
ضلع لاہور وچ ترقیاتی کمّاں، تحصیل سطح اُتے 1500 الیکٹرک بسیں چلاؤن تے 2026-27 دے تعلیمی سیشن لئی سرکاری تے نجی میڈیکل تے ڈینٹل کالجاں دی داخلہ پالیسی منظور کیتی گئی۔
پنجاب وچ بلدیاتی انتخابات دی تاریخ دے اعلان بارے مشاورت لئی صوبائی کابینہ کمیٹی قائم کرن تے ٹریڈنگ کارپوریشن آف پاکستان دے ذریعے گندم درآمد کرن دی منظوری وی دتی گئی۔
پبلک سیکٹر میڈیکل یونیورسٹیاں، جنہاں وچ کنگ ایڈورڈ میڈیکل یونیورسٹی، فاطمہ جناح میڈیکل یونیورسٹی، یونیورسٹی آف ہیلتھ سائنسز، آر ایم یو تے ایف ایم یو شامل نیں، دے وائس چانسلرز دی تعیناتی دی منظوری دتی گئی۔
چیف منسٹر پنجاب ویلیو ایڈیشن فنانسنگ آف پنک سالٹ لئی محکمہ مائنز اینڈ منرلز تے بینک آف پنجاب وچ معاہدے دی منظوری دتی گئی۔ پنجاب ہولی قرآن ایکٹ 2011 وچ ترمیم وی منظور کر لی گئی۔
بریسٹ کینسر بارے آگاہی، بروقت تشخیص اُتے زور
دوجے پاسے وزیراعلیٰ پنجاب مریم نواز نے بریسٹ کینسر بارے آگاہی دے عالمی دن اُتے اپنے پیغام وچ آگاہی تے بروقت تشخیص دی اہمیت اُتے زور دتا۔
اُنہاں آکھیا کہ بریسٹ کینسر بارے آگاہی لئی ہر ہسپتال وچ خصوصی اقدامات کیتے جان۔ لاہور وچ دنیا دا سب توں وڈا نواز شریف کینسر ہسپتال بنایا جا رہیا اے۔
مریم نواز نے آکھیا کہ کینسر بارے آگاہی، احتیاط تے بروقت طبی معائنہ زندگیاں بچاؤن لئی بہت ضروری نیں۔ نواز شریف انسٹیٹیوٹ آف کینسر ٹریٹمنٹ اینڈ ریسرچ سنٹر وچ ہر قسم دے کینسر دا علاج یقینی بنایا جاوے گا۔
اُنہاں آکھیا کہ نواز شریف کینسر ہسپتال وچ بریسٹ کینسر دے ہر مرحلے سمیت مختلف قسم دے کینسر دا علاج کیتا جاوے گا۔ حکومت پنجاب کینسر دے مریضاں نوں 10 لکھ روپے تک مفت علاج دی سہولت فراہم کر رہی اے تے خواتین نوں پنجاب وچ کینسر دی تشخیص تے علاج دیاں سہولتاں فراہم کرن لئی پُرعزم اے۔
