بیرونِ ملک 21647 پاکستانی قید، بجلی تے گیس دا گردشی قرضہ 5306 ارب ہو گیا
سعودی عرب وچ 10,745 تے متحدہ عرب امارات وچ 5,297 پاکستانی قید، 8,569 نوں سزائیں، 13,000 توں ودھ دے مقدمے زیرِ سماعت۔ 30 جون تک بجلی دے شعبے دا گردشی قرضہ 1,675 ارب تے گیس دا قرضہ 3,631 ارب روپے تک پہنچ گیا: قومی اسمبلی دا وقفۂ سوالات۔
اسلام آباد (سید قیصر شاہ، اسلم لڑکا) قومی اسمبلی وچ وقفۂ سوالات دوران دَسیا گیا کہ 21,647 پاکستانی مختلف ملکاں دیاں جیلّاں وچ قید نیں، جنہاں وچوں 8,569 نوں سزائیں سنائیاں جا چکیاں نیں، جدوں کہ 13,000 توں ودھ قیدیاں دے مقدمے بیرونِ ملک عدالتاں وچ زیرِ سماعت نیں۔ 30 جون 2026 تک بجلی دے شعبے دا گردشی قرضہ 1,675 ارب روپے تے گیس دے شعبے دا قرضہ 3,631 ارب روپے تک پہنچ گیا اے۔
وزارتِ خارجہ دے مطابق پاکستانی شہری منشیات، کرنسی، انسانی سمگلنگ، جعل سازی سمیت ہور جرماں وچ ملوث ہون کارن بیرونِ ملک جیلّاں وچ قید نیں۔
سب توں ودھ 10,745 پاکستانی سعودی عرب وچ قید نیں، جدوں کہ متحدہ عرب امارات وچ 5,297، قطر وچ 599، عمان وچ 578، امریکہ وچ 141، برطانیہ وچ 23، ترکیہ وچ 190، اٹلی وچ 353، ملائیشیا وچ 444، یونان وچ 516، بھارت وچ 738، ایران وچ 169، چین وچ 625، تھائی لینڈ وچ 35، قازقستان وچ 91، عراق وچ 81، افغانستان وچ 91، بحرین وچ 218 تے آسٹریلیا وچ 27 پاکستانی قید نیں۔
گیس دے شعبے دا گردشی قرضہ 3,631 ارب روپے تک پہنچ گیا اے۔ پٹرولیم ڈویژن نے انکشاف کیتا کہ اک سال دوران گیس دے شعبے دے گردشی قرضے وچ 344 ارب روپے دا اضافہ ہویا، جس توں بعد مجموعی قرضہ 3,631 ارب روپے تک پہنچ گیا۔
وقفۂ سوالات دوران پیش کیتی گئی رپورٹ مطابق 30 جون 2025 نوں گیس دے شعبے دا گردشی قرضہ 3,288 ارب روپے سی، جیہڑا 30 جون 2026 تک ودھ کے 3,631 ارب روپے ہو گیا۔ گردشی قرضے وچ 1,783 ارب روپے تاخیر نال ادائیگیاں اُتے سرچارج وی شامل اے۔
پٹرولیم ڈویژن دے مطابق ملک وچ گیس دے قابلِ حصول ذخیرے 68,803 بی سی ایف نیں، جنہاں وچوں 48,140 بی سی ایف دی پیداوار ہو رہی اے۔ خام تیل دے قابلِ حصول ذخیرے 1,378 ملین بیرل نیں، جنہاں وچوں 1,102 ملین بیرل خام تیل دی پیداوار ہو چکی اے۔
وزارتِ توانائی نے تحریری طور اُتے دَسیا کہ آر ایل این جی دی فراہمی وچ رکاوٹاں کارن گیس دیاں یوٹیلٹی کمپنیاں نوں دستیاب گیس دے مطابق رسد دا انتظام کرنا پے ریا اے۔
ایوان نوں دَسیا گیا کہ آر ایل این جی دی فراہمی معمول اُتے آون توں بعد گھریلو صارفین نوں ودھ توں ودھ سہولت فراہم کیتی جائے گی۔
وزیرِ سائنس تے ٹیکنالوجی خالد مگسی نے اسمبلی نوں دَسیا کہ کاسمیٹکس مصنوعات دی نگرانی تے لائسنس جاری کرن لئی پاکستان جنرل کاسمیٹکس ریگولیٹری اتھارٹی دے ناں نال اک نواں ادارہ قائم کیتا جائے گا، جدوں کہ جنرل کاسمیٹکس ایکٹ 2023 منسوخ کر دِتا جائے گا۔
