فیڈر نہیں، بجلی چوری والے ٹرانسفارمر بند ہون گے: اویس لغاری
ای پی ایم ایس نصب کیتا جا رہیا اے، ایس نظام نال بجلی چوری دی نشاندہی ہووے گی
بجلی چوراں تے بل نہ ادا کرن والیاں نوں کسے صورت ریلیف نہیں دیا جائے گا: وزیرِ توانائی
ڈی جی خان (مانیٹرنگ ڈیسک) وفاقی وزیرِ توانائی اویس لغاری نے آکھیا اے کہ پورے فیڈر بند نہیں کیتے جان گے، صرف بجلی چوری والے ٹرانسفارمر بند ہون گے۔ بجلی چوری والے علاقیاں وچ مخصوص ٹرانسفارمر بند کرن لئی ای پی ایم ایس نصب کیتا جا رہیا اے۔ ایس نظام دے ذریعے بجلی چوری دی نشاندہی کرکے متعلقہ ٹرانسفارمر بند کیتے جان گے۔
ڈی جی خان ایئرپورٹ دے توسیعی منصوبے دے دورے موقعے اُتے گل بات کردیاں اویس لغاری نے آکھیا کہ بجلی چوری روکڻ لئی جدید ٹیکنالوجی توں فائدہ چکیا جا رہیا اے۔ ای پی ایم ایس دے ذریعے پورے فیڈر دے ہزاراں بے گناہ صارفین متاثر نہیں ہون گے۔ 30 فیصد یا ایس توں ودھ لائن لاسز والے سارے فیڈرز اُتے لوڈشیڈنگ جاری رہے گی۔ بجلی چوری کرن تے بل ادا نہ کرن والیاں نوں کسے صورت ریلیف نہیں دِتا جائے گا۔
وفاقی وزیر نے دسیا کہ ملک وچ بجلی دی مقررہ لوڈشیڈنگ دے ذریعے صارفین نوں بھارے بلّاں توں بچایا گیا اے۔ ایران تے امریکا دی جنگ دی وجہ نال گیس دی قلت پیدا ہو رہی اے، جس کرکے بجلی دی پیداوار مہنگی ہو رہی اے۔
انہاں آکھیا کہ ڈی جی خان ایئرپورٹ دی اَپ گریڈیشن دا منصوبہ ساڑھے 5 ارب روپے دی لاگت نال جنوری 2028 وچ مکمل ہووے گا۔ ڈی جی خان وچ وزیراعظم دے اعلان کردہ ایئرپورٹ دی توسیع، کینسر ہسپتال، سیوریج تے سڑکاں چوڑیاں کرن دے منصوبیاں اُتے کم جاری اے۔
