نویں صوبیاں دا مطالبہ ایم کیو ایم دے قیام توں وی پراݨا اے: خالد مقبول

کراچی (خبر ایجنسیاں) متحدہ قومی موومنٹ پاکستان دے چیئرمین ڈاکٹر خالد مقبول صدیقی نے آکھیا اے کہ کراچی نوں عوام دی رائے لیے بغیر سندھ دا حصہ بنایا گیا، نویں صوبیاں دا قیام وقت دی لوڑ اے۔

نارتھ ناظم آباد ریزیڈنٹس کمیٹی دے شرکاء نال خطاب کردیاں انہاں آکھیا کہ 1970ء دی دہائی تک کراچی دا انتظامی ڈھانچہ موجودہ صورتحال توں وکھرا سی۔ صوبیاں دی بحالی دے ویلے نہ ریفرنڈم کروایا گیا تے نہ ہی عوام دی رائے معلوم کیتی گئی۔

انہاں آکھیا کہ نویں صوبیاں دا مطالبہ ایم کیو ایم دے قیام توں وی پراݨا اے۔ قائداعظمؒ دے پاکستان وچ کراچی ملک دا دارالحکومت سی۔ اسیں تے ساڈے وڈے قائد دے پاکستان وچ آئے ساں، پر کسے نے سانوں بھٹو دے پاکستان وچ دھکیل دتا۔ پاکستان ساڈے وڈیاں دیاں کوششاں نال بنیا، ساڈا معاملہ بھٹو دے پاکستان توں شروع ہوندا اے۔

انہاں مزید آکھیا کہ اسیں اوتھے ملک بنایا جتھے اسیں رہندے نہیں ساں، تے ایس لئی لکھاں قربانیاں دتیاں۔