ایران دے معاملے اُتے جلد کجھ ہون والا اے: ٹرمپ، غیر روایتی جنگ لئی تیار آں: ایرانی آرمی چیف
سعودی عرب دے دمام ایئرپورٹ اُتے حملہ، 2 افراد جاں بحق، 8 زخمی، 48 گھنٹیاں وچ 4 حملے کیتے: حوثی
سعودی فوجی اتحاد دا ریاض تے مدینہ وچ 4 ڈرون مار گران دا دعویٰ، تیل دی وڈی کمپنی آرامکو دے ہیڈکوارٹر توں سارے ملازماں نوں فوری نکلن دا حکم، ایران دی امریکی اڈیاں اُتے حملے دی دھمکی، عالمی سٹاک مارکیٹاں وچ مندی، تیل 4 فیصد مہنگا۔
واشنگٹن، تہران، ریاض (نیوز ایجنسیاں) امریکی صدر ڈونلڈ ٹرمپ نے اشارہ دِتا اے کہ ایران دے معاملے اُتے جلد کجھ ہون والا اے۔ جوائنٹ بیس اینڈریوز وچ صحافیاں نال گل بات دوران ایران نال رابطیاں تے ممکنہ پیش رفت بارے سوال اُتے اُنہاں آکھیا کہ زیادہ تر لوکاں دا خیال اے کہ ایہہ انتخابات توں بعد ہووے گا، پر سانوں ویکھنا پئے گا۔
اُنہاں دا اشارہ امریکہ وچ ہون والے وسط مدتی انتخابات ول سی۔ جدوں اُنہاں توں پُچھیا گیا کہ کی اُنہاں مذاکرات دا راستہ چھڈ دِتا اے، تاں اُنہاں آکھیا کہ میرا خیال اے کہ اسیں مذاکرات نہیں کراں گے، پر جلد کجھ ہو جائے گا۔
ٹرمپ دا ایہہ بیان اوہناں حالات وچ سامنے آیا اے، جدوں نیویارک ٹائمز نے گمنام امریکی حکام دے حوالے نال رپورٹ دِتی اے کہ امریکہ تے اسرائیل نے انتخابات توں بعد ایران اُتے حملے دے منصوبے تیار کیتے نیں۔
ایرانی فوج دے سربراہ میجر جنرل امیر حاتمی نے آکھیا اے کہ ایرانی فوج نے اپنی ڈرون صلاحیتاں نوں ہور مضبوط بنایا اے تے اوہ غیر روایتی جنگ لئی تیار اے۔
تہران وچ فوجی ڈرون بنانے والے اک مرکز دے دورے دوران اُنہاں آکھیا کہ ایرانی مسلح افواج، خاص طور اُتے فوج، نوں ملک دی سلامتی یقینی بناؤن تے ممکنہ خطریاں دا مقابلہ کرن دی ذمہ داری دِتی گئی اے، ایس لئی ہر طرح دے حالات لئی تیاری ضروری اے۔
ایران دی سرکاری نیوز ایجنسی ارنا نے جنرل امیر حاتمی دے حوالے نال دَسیا کہ فوج نے غیر متناسب جنگ لئی ضروری سازوسامان تے افرادی قوت تیار کر رکھی اے تے اوہدی صلاحیت پہلے نالوں زیادہ مضبوط ہو چکی اے۔
بیان مطابق ایرانی فوج ڈرونز دی تیاری، تقسیم تے دیکھ بھال وچ مصروف اے، جدکہ فوجی اہلکاراں نوں انہاں دے استعمال دی تربیت وی دِتی جا چکی اے۔
جنرل امیر حاتمی دے مطابق ڈرونز، بغیر عملے والے بحری جہازاں تے مائیکرو ڈرونز سمیت بغیر پائلٹ ہتھیار جدید جنگ وچ زیادہ اہمیت اختیار کر گئے نیں۔
اُنہاں دَسیا کہ فوج دا ڈرون پروگرام وزارتِ دفاع دے تعاون نال شروع ہویا سی تے ہُن ایس وچ یونیورسٹیاں، ماہرین تے علم اُتے مبنی کمپنیاں وی شامل نیں۔
جنرل امیر حاتمی دے مطابق ایرانی بحریہ سمندر تے آبنائے ہرمز دے مشرقی ساحلی علاقیاں وچ سرگرم موجودگی رکھدی اے۔ اُنہاں دے بقول ایس علاقے وچ داخل ہون والے کسے وی دشمن جہاز نوں نشانہ بنایا جائے گا۔
اُنہاں مزید آکھیا کہ ایران آبنائے ہرمز، خلیج فارس تے بحیرہ عمان وچ آمدورفت بارے اپنے ضابطیاں اُتے عمل کراؤن لئی بحری بارودی سرنگاں تے خودکار کنٹرول نظام استعمال کردا اے۔
ایران دے پاسدارانِ انقلاب نے دھمکی دِتی اے کہ جے آبنائے ہرمز وچ امریکی فوج ولوں جہازاں نوں حفاظتی حصار فراہم کرن دا سلسلہ جاری رہیا، تاں مشرقِ وسطیٰ وچ امریکی فوجی اڈیاں نوں نشانہ بنایا جائے گا۔
ایران دے پاسدارانِ انقلاب دی بحریہ نے جمعرات نوں دعویٰ کیتا کہ شمالی خلیج فارس دے وسطی علاقے وچ تیل دی منتقلی دوران چار جہازاں نوں نشانہ بنایا گیا تے اوہناں وچ اگ لگ گئی۔ بیان مطابق ایہہ جہاز غیر قانونی راستیاں توں گزر رہے سن۔
بیان وچ مزید آکھیا گیا کہ مغربی آبنائے ہرمز وچ تین جہاز بارودی سرنگاں نال ٹکرا گئے، جس دے نتیجے وچ حادثے پیش آئے تے جہازاں وچ اگ لگ گئی۔
سعودی عرب دے دمام ایئرپورٹ اُتے بدھ دی رات گئے حملے وچ دو افراد جاں بحق تے اَٹھ زخمی ہو گئے۔ سعودی سول ایوی ایشن اتھارٹی مطابق حملے وچ اک سعودی تے اک بھارتی شہری جان توں گئے۔
رپورٹ مطابق رواں مہینے سعودی ایئرپورٹاں اُتے حوثیاں دے حملیاں وچ ہُن تک 22 افراد جاں بحق ہو چکے نیں، جدکہ بحیرہ احمر وچ بحری ناکہ بندی نال تیل دی ترسیل وی متاثر ہو رہی اے۔
دوجے پاسے سعودی عرب نے ریاض تے مدینہ منورہ دے علاقیاں وچ چار ڈرون مار گران دا دعویٰ کیتا اے۔ سعودی فوجی اتحاد دے ترجمان ترکی المالکی نے ایکس اُتے دَسیا کہ ڈرونز نوں بروقت کارروائی کردیاں روک کے تباہ کر دِتا گیا۔
حوثیاں دے فوجی ترجمان یحییٰ سریع نے دعویٰ کیتا کہ گزشتہ 48 گھنٹیاں دوران سعودی عرب دے اندر چار فوجی کارروائیاں کیتیاں گئیاں۔ انہاں وچ ریاض وچ وزارتِ دفاع دی عمارت، کنگ فہد بین الاقوامی ایئرپورٹ، آرامکو دی ینبع وچ واقع اک تنصیب تے ابھا بین الاقوامی ایئرپورٹ اُتے حملے شامل سن۔
اُنہاں دے مطابق ایہہ حملے بیلسٹک میزائل تے ڈرونز نال کیتے گئے تے چاروں اہداف نوں براہِ راست نشانہ بنایا گیا۔
یحییٰ سریع نے آکھیا کہ حوثی اپنے ملک تے عوام دے دفاع لئی سعودی عرب دے اندر اپنی کارروائیاں جاری رکھن گے۔
سعودی عرب دی وڈی تیل کمپنی آرامکو نے جمعرات نوں اپنے ہیڈکوارٹر وچ موجود باقی ملازماں نوں وی عمارت فوری خالی کرن دی ہدایت دے دِتی۔
برطانوی میڈیا مطابق تین ذرائع نے سکیورٹی وجوہات دی بنا اُتے ناں ظاہر نہ کرن دی شرط اُتے دَسیا کہ گزشتہ ہفتے مشرقی سعودی عرب وچ کمپنی دے ہیڈکوارٹر نوں نشانہ بنائے جان توں بعد غیر ضروری عملہ پہلے ہی گھراں توں کم کر رہیا سی۔
ہُن باقی ملازماں نوں وی اگلے حکم تک گھر توں کم کرن دی ہدایت دِتی گئی اے۔ ذرائع مطابق دھہران وچ واقع وڈے کمپلیکس دے اندر رہائشی علاقیاں نوں نہ تاں بند کیتا گیا اے تے نہ ہی اوتھوں لوکاں نوں کڈھیا گیا اے۔
حالیہ ہفتیاں دوران سعودی عرب دے شہری بنیادی ڈھانچے، خاص طور اُتے تیل دیاں تنصیباں تے ہوائی اڈیاں اُتے حوثیاں دے حملے غیر معمولی حد تک ودھ گئے نیں۔
مصر دے وزیر خارجہ بدر عبدالعاطی نے سعودی عرب تے یمن دے حوثیاں دے درمیان تنازعے دے سیاسی حل لئی سارے ممکنہ راستے لبھن اُتے زور دِتا اے۔
قاہرہ وچ پریس کانفرنس دوران اُنہاں سعودی عرب نال یکجہتی دا اظہار کردیاں آکھیا کہ مسئلے دے حل لئی سارے سفارتی امکانات استعمال کرنا ضروری اے۔
مشرقِ وسطیٰ وچ کشیدگی تے مصنوعی ذہانت (اے آئی) وچ سرمایہ کاری بارے خدشیاں نے عالمی منڈیاں اُتے دباؤ ودھا دِتا اے۔ جمعرات نوں عالمی سٹاک مارکیٹاں وچ مندی رہی تے ٹیکنالوجی کمپنیاں دے مالی نتائج مایوس کن رہے۔
امریکی ٹیکنالوجی کمپنی میٹا دے حصص 7 فیصد، جدکہ ٹیسلا دے حصص 3 فیصد ڈِگ گئے۔ نیسڈیک انڈیکس وچ 2.6 فیصد کمی ریکارڈ کیتی گئی۔ ٹیسلا دے منافع وچ وی کمی سامنے آئی۔
دوجے پاسے برینٹ نارتھ سی خام تیل دی قیمت 4 فیصد ودھن توں بعد 113.17 ڈالر فی بیرل تک پہنچ گئی، جدکہ ویسٹ ٹیکساس انٹرمیڈیٹ دی قیمت 2.4 فیصد اضافے نال 99.47 ڈالر فی بیرل ہو گئی۔
امریکی محکمہ خزانہ نے ایران اُتے نویاں پابندیاں لا دِتیاں نیں، جنہاں تحت پنج افراد، چار کمپنیاں تے نو بحری جہازاں نوں پابندیاں دی فہرست وچ شامل کیتا گیا اے۔
امریکی محکمہ خزانہ مطابق پابندیاں دی زد وچ سنگاپور تے متحدہ عرب امارات وچ قائم اوہ شپنگ ایجنٹ وی آئے نیں، جیہڑے ایران دی مدد وچ ملوث نیں۔
امریکی وزیر خزانہ نے آکھیا اے کہ ایران دی مدد کرن والے افراد تے اداریاں دے خلاف پابندیاں لاؤن دا سلسلہ جاری رکھیا جائے گا۔
