کرک: فائرنگ دا تبادلہ، ڈی ایس پی سمیت 4 اہلکار شہید، 2 دہشت گرد ہلاک
شہیداں وچ ڈی ایس پی عمران الدین دے علاوہ ایس ایچ او افضل اعوان تے دو سپاہی کاظم تے امجد وی شامل، پولیس دی ہور نفری موقعے اُتے پہنچ گئی، آخری اطلاعات تک علاقے وچ دہشت گرداں خلاف آپریشن جاری رہیا
پشاور (نیوز ایجنسیاں، مانیٹرنگ ڈیسک) کرک دی تحصیل بانڈہ داؤد شاہ دے علاقے جالا چارپرہ وچ پولیس، کاؤنٹر ٹیررازم ڈیپارٹمنٹ (سی ٹی ڈی) تے دہشت گرداں وچ فائرنگ دے تبادلے دوران ڈی ایس پی سی ٹی ڈی تے ایس ایچ او سمیت چار اہلکار شہید ہو گئے، جدکہ پولیس دے مطابق دو دہشت گرد وی ہلاک کر دتے گئے۔
ابتدائی اطلاعات دے مطابق جمعرات دے روز تھانہ خرم محمدزئی دی حدود وچ بنوں روڈ اُتے واقع علاقے جالا چارپرہ دے اک مکان وچ دہشت گرداں دی موجودگی دی اطلاع اُتے پولیس تے سی ٹی ڈی نے مشترکہ آپریشن شروع کیتا۔ ایس دوران مبینہ دہشت گرداں نے سکیورٹی اہلکاراں اُتے شدید فائرنگ کر دتی، جس دے جواب وچ پولیس تے سی ٹی ڈی دے اہلکاراں نے بھرپور جوابی کارروائی کیتی۔
پولیس توں ملن والیاں ابتدائی معلومات دے مطابق فائرنگ دے تبادلے وچ ڈی ایس پی سی ٹی ڈی کرک عمران الدین، انہاں دے محافظ کاظم، تھانہ لتمبر دے ایس ایچ او افضل اعوان تے بم ڈسپوزل یونٹ دا اہلکار امجد شہید ہو گئے۔
پولیس دے مطابق کارروائی دوران دو دہشت گرد ہلاک ہو گئے، جدکہ علاقے وچ موجود ہور مبینہ دہشت گرداں خلاف کارروائی جاری سی۔ واقعے دی اطلاع ملن اُتے پولیس دی ہور نفری وی جائے وقوعہ اُتے پہنچ گئی۔
آخری اطلاعات موصول ہون تک علاقے وچ فائرنگ دا تبادلہ جاری سی تے سکیورٹی اہلکاراں ولوں آپریشن جاری رکھیا گیا سی۔
