نارنگ: موٹروے اُتے ایلیٹ پولیس دی گاڈی نوں حادثہ، 2 کانسٹیبل جاں بحق، 4 زخمی
ایلیٹ پولیس فورس جہلم دے اہلکار خصوصی ڈیوٹی لئی لاہور آ رہے سن، انٹرچینج دے نیڑے گاڈی دا ٹائر پھٹ گیا
ہیڈ کانسٹیبل نوید افضل تے ڈرائیور اصغر موقعے اُتے دم توڑ گئے، زخمی اہلکار میو ہسپتال داخل، آئی جی پنجاب دا اظہارِ افسوس۔
نارنگ منڈی، مریدکے، لالہ موسیٰ، لاہور سیالکوٹ موٹروے اُتے مریدکے نارنگ قرشی انٹرچینج دے نیڑے ایلیٹ پولیس جہلم دی گاڈی نوں حادثہ پیش آ گیا۔ ڈرائیور سمیت 2 پولیس اہلکار جاں بحق ہو گئے، جدوں کہ 4 اہلکار شدید زخمی ہو گئے۔ زخمی اہلکاراں نوں میو ہسپتال لاہور منتقل کر دتا گیا، جتھے اوہناں دی حالت تشویشناک دسی جا رہی اے۔
تفصیلات مطابق ایلیٹ پولیس فورس جہلم دے اہلکار خصوصی ڈیوٹی لئی گاڈی اُتے سیالکوٹ موٹروے دے راستے لاہور آ رہے سن کہ نارنگ مریدکے روڈ اُتے قرشی انٹرچینج دے نیڑے اچانک گاڈی دا ٹائر پھٹ گیا تے گاڈی اُلٹ گئی۔
حادثے دے نتیجے وچ ہیڈ کانسٹیبل 60 سالہ محمد نوید افضل، رہائشی جہلم، تے ڈرائیور اصغر، رہائشی گجرات، موقعے اُتے ہی دم توڑ گئے، جدوں کہ گاڈی وچ سوار ہور 4 اہلکار سرمد، مدثر، ہارون تے فائق شدید زخمی ہو گئے۔
حادثے دی اطلاع ملدیاں ہی امدادی ٹیمیں تے پولیس موقعے اُتے پہنچ گئیاں۔ زخمی اہلکاراں نوں ابتدائی طبی امداد دین توں بعد میو ہسپتال لاہور منتقل کر دتا گیا۔ زخمی اہلکاراں دی حالت نازک دسی جا رہی اے۔
دریں اثنا، سینئر پولیس افسراں نے میو ہسپتال وچ زیرِ علاج زخمی پولیس اہلکاراں دی عیادت کیتی تے اوہناں دی جلد صحت یابی لئی دعا کیتی۔
دوجے پاسے آئی جی پنجاب عبدالکریم نے شیخوپورہ موٹروے اُتے قرشی انٹرچینج دے نیڑے ایلیٹ پولیس فورس جہلم دی گاڈی نوں پیش آون والے حادثے وچ 2 پولیس اہلکاراں دی شہادت اُتے گہرے دکھ تے افسوس دا اظہار کیتا اے۔
آئی جی پنجاب نے ایڈیشنل آئی جی ایلیٹ پولیس فورس توں حادثے دی رپورٹ طلب کردیاں زخمی اہلکاراں نوں بہترین طبی سہولتاں فراہم کرن دی ہدایت دتی اے۔
اوہناں آکھیا کہ پنجاب پولیس دکھ دی ایس گھڑی وچ شہیداں دے خاندانواں دے نال برابر دی شریک اے۔ شہیداں دے خاندانواں دی فلاح و بہبود پنجاب پولیس دی اولین ترجیح اے۔
