مریم نواز دی صدارت ہیٹھ اجلاس صرف 10 کلو آٹے دے تھیلے فروخت کرن دی اجازت
مریم نواز دی صدارت ہیٹھ اجلاس، 20 کلو آٹے دے تھیلے دی فروخت اُتے پابندی لاؤن اُتے اتفاق
آٹا تے گندم دی سمگلنگ روکڻ لئی بین الصوبائی سرحداں دی سخت نگرانی دا حکم، نمبردار، گھوڑی پال سکیم تے اپنا کھیت سکیم دی ساری زمین اُتے گندم دی کاشت کیتی جائے، رمضان لئی پھل سٹور کیتے جان: وزیراعلیٰ
لاہور (سٹاف رپورٹر) وزیراعلیٰ مریم نواز دی صدارت ہیٹھ خصوصی اجلاس ہویا، جس وچ کمشنراں تے ڈپٹی کمشنراں نے ویڈیو لنک راہیں شرکت کیتی۔ اجلاس وچ روزمرہ دیاں کھان پین دیاں اشیاء دیاں قیمتاں وچ اتار چڑھاؤ بارے تفصیلی رپورٹ پیش کیتی گئی۔
رپورٹ وچ دسیا گیا کہ 10 اشیاء دیاں قیمتاں وچ مسلسل کمی دا رجحان جاری اے۔ اِس موقع اُتے صوبے بھر وچ 20 کلو آٹے دے تھیلے دی فروخت اُتے پابندی لاؤن اُتے اتفاق کیتا گیا۔ اجلاس وچ مارکیٹ وچ صرف 10 کلو آٹے دے تھیلے دی فروخت دی اجازت دین دا فیصلہ کیتا گیا۔
وزیراعلیٰ مریم نواز شریف نے آٹا تے گندم دی سمگلنگ روکڻ لئی بین الصوبائی سرحداں دی سخت نگرانی دا حکم دِتا تے سارے ڈپٹی کمشنراں نوں اپنے متعلقہ ضلعے وچ گندم دی بوائی دا ہدف پورا کرن دی ہدایت کیتی۔
اجلاس وچ نمبردار، گھوڑی پال سکیم تے ’’اپنا کھیت، اپنا روزگار‘‘ سکیم دے تحت ساری زمین اُتے گندم دی کاشت کرن دا فیصلہ کیتا گیا۔ وزیراعلیٰ نے سارے ضلعیاں وچ سرکاری زمین اُتے گندم دی کاشت یقینی بناؤن دا حکم دِتا۔
اجلاس وچ پنجاب وچ پہلی واری ٹرانسفارمنگ مارکیٹ ویسٹ اِنٹو ویلتھ منصوبہ متعارف کراؤن دا فیصلہ وی کیتا گیا۔
وزیراعلیٰ مریم نواز شریف نے پامرا دے تحت بےموسمی سبزیاں تے پھلاں دی دستیابی یقینی بناؤن لئی ڈی ہائیڈریشن منصوبے دی وی منظوری دے دِتی۔
اِس موقع اُتے دسیا گیا کہ کاہنہ وچ سبزیاں تے پھلاں لئی پنجاب دا پہلا منڈی مارٹ منصوبہ شروع ہو چکیا اے۔ وزیراعلیٰ نے منڈی مارٹ دی جلد تکمیل دا ہدف مقرر کیتا تے صوبے بھر وچ منڈی مارٹ قائم کرن لئی اقدامات دی ہدایت کیتی۔
وزیراعلیٰ مریم نواز شریف نے رمضان المبارک دیاں ضروریات دے مطابق کیلے، سیب تے کھجوراں دی مقررہ قیمتاں اُتے دستیابی یقینی بناؤن لئی اقدامات دا حکم دِتا۔
اُنہاں آکھیا کہ ہر ڈپٹی کمشنر اپنے علاقے وچ کولڈ سٹوریج اندر کیلے، سیب تے کھجوراں دی ضرورت دے مطابق ذخیرہ اندوزی دی بجائے مناسب سٹوریج دا انتظام یقینی بنائے گا۔
وزیراعلیٰ نے کھلے دودھ دی حفظانِ صحت دے اصولاں مطابق فروخت نوں ضابطے وچ لیاؤن لئی مؤثر اقدامات دا حکم وی دِتا۔
مریم نواز شریف نوں سبزیاں، دالاں تے ہور اجناس سمیت 15 کھان پین دیاں اشیاء دیاں قیمتاں دا تقابلی جائزہ پیش کیتا گیا۔
بریفنگ وچ دسیا گیا کہ 10 اشیاء دیاں قیمتاں وچ 2.52 فیصد تک کمی دا رجحان ریکارڈ کیتا گیا اے۔ زیادہ تر اشیائے خورونوش دیاں قیمتاں مستحکم نیں تے دالاں دیاں قیمتاں وی برقرار نیں۔
اشیاء دیاں قیمتاں دی نگرانی تے استحکام لئی قیمت ایپ نوں اپ گریڈ کیتا جائے گا۔
