بجلی دے صارفین نوں مینوئل تے من مانے ڈیٹیکشن بل جاری کرن اُتے پابندی خلاف ورزی کرن والیاں نوں سخت سزا ں: وزیرِ توانائی
ڈیٹیکشن بلنگ مرکزی پورٹل راہیں ہووے گی، ڈیٹیکشن بل دا دورانیہ تین بلنگ سائیکلز، خراب یا سڑیا ہویا میٹر فوری یا ودھ توں ودھ دو بلنگ سائیکلز وچ تبدیل کیتا جائے گا
بجلی چوری روکنا ترجیح اے، شہریاں اُتے من مانا بوجھ پاؤن دی اجازت نہیں دِتی جا سکدی: اویس لغاری، ڈسکوز دے بورڈ آف ڈائریکٹرز نال خطاب
اسلام آباد (نامہ نگار) وفاقی وزیر توانائی اویس لغاری نے بجلی تقسیم کرن والیاں کمپنیوں (ڈسکوز) ولوں صارفین نوں اضافی تے غلط بل بھیجن دا سخت نوٹس لیندیاں خبردار کیتا اے کہ آئندہ کسے وی صارف نوں غلط ڈیٹیکشن بل جاری نہیں کیتا جائے گا۔
ڈسکوز دے بورڈ آف ڈائریکٹرز دے اہم اجلاس نال خطاب کردیاں وفاقی وزیر نے سخت تے جامع اصلاحاتی فریم ورک لاگو کرن دیاں باقاعدہ ہدایات جاری کر دِتیاں۔
اُنہاں واضح کیتا کہ بجلی چوری دی روک تھام بلاشبہ قومی ترجیح اے، پر بےگناہ شہریاں اُتے من مانا مالی بوجھ پاؤن دی ہرگز اجازت نہیں دِتی جا سکدی۔
اِس فریم ورک دے تحت فیلڈ عملے دے صوابدیدی اختیارات نوں مکمل طور اُتے ضابطے دے تابع بنایا جا رہیا اے، تاں جو عوام نوں تحفظ ملے تے بجلی چوری دے خلاف ایمانداری نال ڈیوٹی کرن والے افسراں دے کم وچ وی کوئی رکاوٹ نہ آوے۔
وفاقی وزیر دیاں ہدایات دی روشنی وچ پاور ڈویژن ساریاں ڈسکوز نوں پابند کر رہی اے کہ ہُن ڈیٹیکشن بلنگ صرف پی آئی ٹی سی دے مرکزی آن لائن پورٹل راہیں ہی کیتی جائے گی۔
فیلڈ عملے یا ایس ڈی اوز ولوں ہتھ نال تے من مانے طریقے نال ڈیٹیکشن بل جاری کرن اُتے مکمل پابندی لا دِتی گئی اے۔
مینوئل طریقے نال بل جاری کرن دے عمل نوں باقاعدہ طور اُتے سنگین بدعنوانی تے بدانتظامی تصور کیتا جائے گا، جس اُتے متعلقہ افسراں تے اہلکاراں دے خلاف سخت محکمانہ کارروائی کردیاں وڈیاں سزواں دِتیاں جان گیاں۔
نویں اصلاحاتی فریم ورک دے تحت خراب یا سڑے ہوئے میٹر فوری طور اُتے یا ودھ توں ودھ دو بلنگ سائیکلز دے اندر تبدیل کرنا لازمی قرار دِتا گیا اے، جدکہ اِس دوران اوسط بلنگ دا بوجھ وی صرف دو مہینیاں تک محدود رہے گا۔
اویس لغاری نے آکھیا کہ جے میٹر دی رفتار گھٹ یا ودھ ثابت ہووے، تاں بقایا رقم دی وصولی یا کریڈٹ ایڈجسٹمنٹ نوں سختی نال پچھلے دو بلنگ سائیکلز تک محدود رکھیا جا سکے گا۔
اِسی طرح ڈیٹیکشن بلنگ دے دورانیے لئی وی واضح ضابطے مقرر کرن دی تجویز دِتی گئی اے۔ غیر قانونی بجلی استعمال دے معاملے وچ عام صارفین لئی ڈیٹیکشن بل دا دورانیہ تین بلنگ سائیکلز مقرر کرن دی تجویز اے۔
رجسٹرڈ صارفین لئی ڈیٹیکشن بلنگ دی زیادہ توں زیادہ حد 6 مہینے، جدکہ غیر رجسٹرڈ صارفین لئی 12 مہینے تک محدود رکھی جائے گی۔
اُنہاں آکھیا کہ اصلاحاتی نظام دے تحت ڈسکوز دے بورڈ آف ڈائریکٹرز تے اُنہاں دیاں کسٹمر سروسز کمیٹیاں نوں ہدایت کیتی گئی اے کہ اوہ ہر مہینے ڈیٹیکشن بلز دی درستگی، شفافیت تے جائز وصولی دا باقاعدگی نال تفصیلی جائزہ لین۔
اویس احمد خان لغاری نے عزم دا اعادہ کیتا کہ حکومت دا مقصد بجلی دے شعبے نوں صارف دوست بنانا تے ہر سطح اُتے مکمل جوابدہی یقینی بنانا اے۔
اُنہاں زور دِتا کہ صارفین دے حقوق دا تحفظ پہلی ترجیح اے تے کسے نوں وی قانون تے قواعد و ضوابط توں بالاتر ہو کے عوام دا معاشی استحصال کرن دی اجازت نہیں دِتی جائے گی۔
