کامیاب جوان پروگرام دے دوجے مرحلے دی منظوری، 25ارب روپے جاری

اسلام آباد: وزیراعظم عمران خان نے کامیاب جوان پروگرام دے دوجے مرحلے دی منظوری دے دتی اے۔ وفاقی حکومت نے کامیاب جوان پروگرام دا دوجا مرحلہ فوری شروع کرن دا فیصلہ کیتا اے جد کہ وزیراعظم عمران خان نے معاون خصوصی عثمان ڈار نال ملاقات دے بعد پروگرام دی منظوری وی دے دتی اے۔ سرکار نے دوجے مرحلے لئی 25ارب روپے جاری کر دتے نیں، حکومتی ہدایات دے مطابق قرض تے مارک اپ وچ وی کمی کر دتی گئی اے، دوجے مرحلے لئی مارک اپ 6توں گھٹ کرکے 3فیصد کر دتا گیا اے، قرض دے ودھ توں ودھ حد 50لکھ توں ودھا کے ڈھائی کروڑ کر دتی گئی۔ معاون خصوصی عثمان ڈار دا کہنا اے نوجوان اپنے کاروبار لئی 1لکھ توں ڈھائی کروڑ تک دا قرض لے سکن گے، فیصلہ کورونا پاروں معیشت نوں درپیش چیلنجاں دے پیش نظر کیتا گیا، جہڑے نوجوان مالی مشکلات دا شکار نیں اوہ ایس پروگرام توں بھرپور فیدہ چُکن، نوجوان صرف کاروبار دا منصوبہ بنان، سرکار بغیر گارنٹی دے قرض دیوے گی، بغیر گارنٹی قرض دی حد وی 5لکھ توں ودھا کے 10لکھ کر دتی گئی اے۔