سندھ اسمبلی نے نویں صوبے اُتے فل سٹاپ لا دتا، ہُن ایہہ موضوع بند کرو: بلاول بھٹو
عوام ہی سندھ دی قسمت دا فیصلہ کر سکدے نیں، اوہناں اپنا فیصلہ سنا دتا، 28ویں ترمیم اُتے کوئی مشاورت نہیں ہوئی، وفاقی کابینہ دے لوک کراچی وچ ٹکے دا کم نہیں کردے، وفاق وی دلچسپی نہیں لیندا، نمائندے نفرت پھیلا رہے نیں: بلاول بھٹو
کراچی (سٹاف رپورٹر، مانیٹرنگ ڈیسک، نیوز ایجنسیاں) چیئرمین پیپلز پارٹی بلاول بھٹو زرداری نے آکھیا اے کہ وفاق نال 28ویں ترمیم اُتے کسے وی قسم دی کوئی مشاورت نہیں ہوئی۔ اوہناں آکھیا کہ سندھ اسمبلی نے سندھ وچ نویں صوبے دے معاملے اُتے فل سٹاپ لا دتا اے۔
کراچی وچ ہسپتال دی تقریب نوں خطاب کردیاں اوہناں مجوزہ 28ویں آئینی ترمیم دے حوالے نال آکھیا کہ ایس بارے پیپلز پارٹی دا واضح مؤقف وار وار سامنے آ چکیا اے، جدوں کہ صوبہ سندھ دا مؤقف وی ستویں، اَٹھویں واری صوبائی اسمبلی دے فورم توں ظاہر کیتا جا چکیا اے۔ ایس لئی سندھ اسمبلی دے بعد ہُن ایس گل بات اُتے سانوں وی فل سٹاپ لا دینا چاہیدا اے۔
بلاول بھٹو نے آکھیا کہ جتھوں تک صوبہ سندھ دا سوال اے، ایتھوں دے عوام تے منتخب نمائندیاں نے اپنا فیصلہ سنا دتا اے۔ ایتھوں دے عوام ہی ایس صوبے دی قسمت دا فیصلہ کر سکدے نیں۔ کوئی ہور ایس صوبے یا ایس شہر دی قسمت دا فیصلہ نہیں کر سکدا، ایس لئی میرا خیال اے کہ ہُن اس موضوع نوں بند کر دینا چاہیدا اے۔
بلاول نے ہور آکھیا کہ سیاست داناں دا کم لوکاں وچ نفرت تے وکھرے پن نوں ودھانا نہیں۔ کراچی نال تعلق رکھن والے وفاقی کابینہ دے لوکاں نے شہر وچ ٹکے دا کم نہیں کیتا۔ وفاقی حکومت کراچی وچ دلچسپی نہیں لیندی، بلکہ اوہدے نمائندے شہر وچ نفرت پھیلاؤن وچ لگے ہوئے نیں۔
اوہناں آکھیا کہ وفاقی حکومت نوں کراچی اُتے توجہ دینی چاہیدی اے۔ جے شہر وچ وفاقی تے صوبائی ادارے رَل کے کم کرن تاں عوام دی خدمت کیتی جا سکدی اے۔
چیئرمین پیپلز پارٹی نے آکھیا کہ حکومت دا فرض اے کہ اوہ عوام لئی آسانیاں پیدا کرے۔ ملک وچ مہنگائی تے بے روزگاری عروج اُتے اے۔ سندھ حکومت دی کوشش اے کہ عوام اُتے معاشی بوجھ گھٹایا جا سکے۔ بجلی دے بل اینے ودھ چکے نیں کہ عوام لئی ادائیگی کرنا مشکل ہو گیا اے۔
بلاول بھٹو نے آکھیا کہ میں سوچ رہیا ساں، کاش اسیں پورے لیاری نوں شمسی توانائی اُتے منتقل کر سکدے۔ سندھ حکومت کوشش کر رہی اے کہ لیاری دے عوام نوں شمسی توانائی فراہم کیتی جاوے۔
