اسلام آباد ماڈل جیل مکمل، وزیراعظم چند دناں وچ افتتاح کرن گے: محسن نقوی

اسلام آباد (خصوصی رپورٹر، اے پی پی) وفاقی دارالحکومت وچ پچھلے 17 ورھیاں توں رُکیا ہویا اسلام آباد ماڈل جیل دا جدید منصوبہ آخرکار مکمل کر لیا گیا اے، جس دے پہلے مرحلے وچ 1500 قیدیاں نوں منتقل کیتا جائے گا۔

وزیر داخلہ محسن نقوی دا کہنا اے کہ سیکٹر ایچ 16 وچ تعمیر کیتی گئی اسلام آباد ماڈل جیل دا وزیراعظم شہباز شریف آئندے دو توں چار دناں وچ باقاعدہ افتتاح کرن گے، جس توں بعد اڈیالہ جیل توں قیدیاں دی منتقلی دا عمل شروع کر دتا جائے گا۔

نوی جیل دے دورے دے موقعے ’تے گل بات کردیاں محسن نقوی نے دسیا کہ نومبر وچ اڈیالہ جیل توں پہلے مرحلے وچ اسلام آباد دے 1500 قیدی نویں جیل وچ منتقل کیتے جان گے، جدوں کہ دوجے مرحلے وچ ہور 3 ہزار توں 4 ہزار قیدیاں دی منتقلی دی توقع اے۔

دورے دوران محسن نقوی نے قیدیاں لئی تیار کیتا جان والا کھانا وی چکھیا۔