نیب شخصیات دی بجائے بدعنوانی نوں نشانہ بناندا اے: چیئرمین

افسر اپنی ذمہ داریاں اعلیٰ اخلاقی قدراں دے مطابق نبھاؤن: لیفٹیننٹ جنرل (ر) نذیر احمد

تیجی سہ ماہی وچ 4280 متاثرین نوں 90 کروڑ 84 لکھ روپے واپس کر دتے گئے: بریفنگ

اسلام آباد (اے پی پی) چیئرمین قومی احتساب بیورو (نیب) لیفٹیننٹ جنرل (ر) نذیر احمد نے آکھیا اے کہ مؤثر عوامی انتظامیہ لئی دیانت داری، پیشہ ورانہ مہارت، شفافیت تے جوابدہی بنیادی ستون نیں۔ سرکاری افسر اپنی ذمہ داریاں اعلیٰ اخلاقی قدراں دے مطابق نبھاؤن۔

نیب دے ترجمان دے مطابق، اُنہاں نیشنل انسٹی ٹیوٹ آف پبلک ایڈمنسٹریشن اسلام آباد دے 40ویں سینئر مینجمنٹ کورس دے 17 رکنی وفد نال نیب ہیڈکوارٹرز وچ خطاب کردیاں آکھیا کہ نیب شخصیات دی بجائے سرکاری منصوبیاں وچ بدعنوانی دے طریقۂ کار تے سرگرمیاں نوں نشانہ بناندا اے۔ ملزماں دی عزتِ نفس تے بنیادی انسانی حقاں دا احترام یقینی بنایا جاندا اے۔

اُنہاں آکھیا کہ سرکاری افسران دی سہولت لئی احتساب سہولت مراکز قائم کیتے گئے نیں۔

ایس موقعے ’تے ڈی جی آپریشنز نیب احمد مجید اولکھ نے بریفنگ دیندیاں دسیا کہ 2026 دی تیجی سہ ماہی وچ 9.18 کھرب روپے، جدوں کہ مارچ 2023 توں ستمبر 2026 تک مجموعی طور ’تے 26.1 کھرب روپے دی ریکوری کیتی گئی۔

تیجی سہ ماہی وچ 4280 متاثرین نوں 90 کروڑ 84 لکھ روپے واپس کیتے گئے۔ اُنہاں سرکاری زمین واگزار کراؤن، ادارہ جاتی اصلاحات تے جدید ٹیکنالوجی دے استعمال بارے وی آگاہ کیتا۔

تحقیقات تے شکایتاں دے نظام نوں مؤثر بناؤن لئی مصنوعی ذہانت اُتے مبنی نظام ’’نیب آئی‘‘ وی متعارف کرایا گیا اے۔

شاہانہ بتول دی سربراہی وچ وفد نے نیب دی کارکردگی تے اصلاحات بارے بریفنگ نوں فائدہ مند قرار دتا۔