زرمبادلہ دے ذخیرے ودھ کے 21.5 ارب ڈالر تک پہنچ گئے
اسلام آباد (نیوز ایجنسیاں) وفاقی پارلیمانی سیکرٹری برائے اطلاعات و نشریات بیرسٹر دانیال نے آکھیا اے کہ پاکستان دے زرمبادلہ دے ذخیرے ودھ کے 21.5 ارب ڈالر تک پہنچ گئے نیں۔
منگل نوں سوشل میڈیا دی ویب سائٹ ایکس اُتے اپنے بیان وچ اُنہاں آکھیا کہ مالی سال 2026-27 دی پہلی سہ ماہی دوران برآمدات وچ 11 فیصد اضافہ ہویا اے تے انہاں دا حجم 11.2 ارب ڈالر ہو گیا اے۔ ایس عرصے دوران غیر ملکی سرمایہ کاری وچ وی 20 فیصد اضافہ ریکارڈ کیتا گیا۔
اُنہاں آکھیا کہ موجودہ مالی سال دوران بیرونِ ملک رہن والے پاکستانیواں دیاں ترسیلاتِ زر 45 ارب ڈالر تک پہنچن دی توقع اے، جیہڑی ملکی معیشت لئی حوصلہ افزا امکانات دی عکاسی کردی اے۔
پارلیمانی سیکرٹری نے آکھیا کہ وزیراعظم محمد شہباز شریف دی قیادت وچ مسلسل معاشی اصلاحات تے برآمدات اُتے مبنی ترقی نوں فروغ دینا، مضبوط تے خوشحال پاکستان دی تعمیر لئی بنیادی اہمیت رکھدا اے۔
