سی پیک نے ساڈیاں زمیناں نوں جوڑیا، ہُن ذہن وی جڑن گے: وزیرِ اطلاعات

انفارمیشن کوریڈور پاک چین دوستی نوں نویاں نسلاں تک پہنچاؤن وچ اہم کردار ادا کرے گا، ڈیجیٹل معیشت لئی دونے ملک رل کے اگے ودھدے رہن گے: عطا تارڑ

اسلام آباد (وقائع نگار) وفاقی وزیرِ اطلاعات و نشریات عطا اللہ تارڑ نے آکھیا اے کہ پاکستان چین انفارمیشن کوریڈور پاک چین دوستی نوں نویاں نسلاں تک پہنچاؤن، دوناں ملکاں دے عوام وچ باہمی اعتماد تے ہم آہنگی نوں فروغ دین، میڈیا تعاون، حقائق اُتے مبنی معلومات دے تبادلے، تجارت تے سرمایہ کاری، مشترکہ تحقیق تے ثقافتی رابطیاں نوں وسعت دین وچ اہم کردار ادا کرے گا۔

اُنہاں آکھیا کہ سی پیک دے پہلے مرحلے نے ساڈیاں زمیناں نوں جوڑیا، اگلا مرحلہ ساڈے ذہن جوڑے گا۔ جے سی پیک ساڈے مشترکہ مستقبل دا جسم اے، تاں چین پاکستان انفارمیشن کوریڈور ایس دی آواز ہووے گا۔ صدر شی جن پنگ نے سانوں مشترکہ مستقبل دا وژن دتا اے۔

اُنہاں دا کہنا سی کہ نوجواناں دے ہتھاں وچ لیپ ٹاپ اک پاسپورٹ اے تے سمارٹ فون اک منڈی اے۔ ڈیجیٹل دور وچ رابطہ طاقت اے تے بیانیہ خودمختاری اے۔ پاکستان تے چین مشترکہ مستقبل دی تعمیر، ڈیجیٹل معیشت دے فروغ تے دوطرفہ تعلقات نوں ہور مضبوط بناؤن لئی رل کے اگے ودھدے رہن گے۔

اوہ پاک چائنا فرینڈشپ سینٹر وچ چین پاکستان انفارمیشن کوریڈور دی افتتاحی تقریب نوں خطاب کر رہے سن۔ ایس موقعے اُتے چین دی وزارتِ خارجہ دی ترجمان ماؤ ننگ، پاکستان وچ چین دے سفیر جیانگ ژائی ڈونگ، سیکرٹری اطلاعات و نشریات سمیت ہور اہم شخصیات وی موجود سن۔

اُنہاں دسیا کہ سنکیانگ تے گلگت بلتستان دے درمیان سیاحتی راہداری اُتے کم جاری اے، جس نال چینی سیاحاں دے سفر نوں پاکستان دے شمالی علاقیاں دیاں وادیاں تک وسعت دتی جاوے گی۔