اسیں نعریاں اُتے نہیں عمل اُتے یقین رکھنے آں: وزیراعلیٰ پنجاب عثمان بزدار
لہور: وزیراعلیٰ پنجاب دا کہنا اے اسیں نعریاں تے نہیں عمل تے یقین رکھنے آں، اللہ نے خدمت خلق دا جہڑا موقع عطا کیتا اے، ایہنوں عبادت سمجھ کے نبھا رہے آں۔ وزیراعلیٰ پنجاب نال اراکین قومی اسمبلی راجہ ریاض تے ملک احسان ٹوانہ نے ملاقات کیتی جہدے وچ حلقیاں دے مسئلیاں تے ترقیاتی منصوبیاں دے حوالے نال تبادلہ خیال کیتا گیا۔ عثمان بزدار نے اراکین قومی اسمبلی نوں اوہناں دے حلقیاں دے مسئلے جلد حل کرن دی یقین دہانی کرائی تے آکھیا ترقیاتی منصوبیاں وچ منتخب نمائندیاں دی مشاورت شامل اے، حلقیاں دے مسئلے حل کرنا تے جاری ترقیاتی سکیماں دی جلد تکمیل اولین ترجیح اے، تحریک انصاف دی حکومت سارے علاقیاں دی یکساں ترقی تے یقین رکھدی اے۔عثمان بزدار دا کہنا سی پچھلے حکمراناں نے عوام دے بنیادی مسئلیاں نوں یکسر نظر انداز کیتا، سرکار نے عوام دے بنیادی مسئلیاں دے حل تے توجہ مرکوز کر رکھی اے، تحریک انصاف دی حکومت پچھلے دور دی خرابیاں نوں دور کر رہی اے، پچھلے حکمراناں دی غلط پالیسیاں پاروں ملک اپنی اصل منزل توں دور ہو گیا، ماضی وچ قومی وسائل نوں نمائشی منصوبیاں دی نذر کرکے ملک و قوم نال ظلم کیتا گیا۔
