حکومت دا اپوزیشن نال مذاکرات کرنا کمزوری نہیں، ذمہ داری اے
اپوزیشن لیڈر محمود خان اچکزئی ولوں وزیراعظم ہاؤس جان اُتے آمادگی تے بامقصد مذاکراتی عمل دا اشارہ ایہ ظاہر کر رہیا اے کہ حالات اپوزیشن نوں ایس مرحلے اُتے لے آئے نیں جتھے اوہ رل کے بیٹھن تے باہمی تنازعات تے آئینی معاملے اُتے حکومت نال مذاکرات لئی تیار اے۔ ایس توں پہلے جدوں اپوزیشن نوں آئینی تقرریاں سمیت اہم معاملے اُتے گل بات دی پیشکش کیتی جاندی رہی تاں اپوزیشن لیڈر وزیراعظم ہاؤس جان توں انکاری سن۔ انہاں نے سپیکر قومی اسمبلی ایاز صادق دے حوالے نال وی اک لکیر کھچ رکھی سی۔ لہٰذا ایہ جائزہ لینا ضروری اے کہ اپوزیشن مذاکرات لئی تیار کیوں ہوئی۔
ویسے تاں آکھیا جا رہیا اے کہ اپوزیشن لیڈر دی وزیراعظم ہاؤس جان لئی آمادگی اک مثبت اشارہ اے، پر وزیراعظم ہاؤس جان دی تیاری نال پیش رفت دی ضمانت نہیں ملدی۔ پیش رفت دا دارومدار ایس گل اُتے ہووے گا کہ ملاقات دے پچھے ٹھوس ایجنڈا، باہمی اعتماد تے عملی فیصلے کرن دی ضمانت موجود ہووے۔ مذاکراتی عمل دی کامیابی لئی ضروری اے کہ مذاکرات دے خواہش مند افراد ہی اگے آون، تاں جو گل بات ذمہ دارانہ انداز وچ ہوندی نظر آوے۔ فریقین کول فیصلے کرن، منوان تے انہاں اُتے عمل درآمد کراؤن دی سیاسی طاقت وی ہونی چاہیدی اے۔
ایس گل دا تجزیہ وی ضروری اے کہ جمہوری ملکاں تے معاشریاں وچ حکومت تے اپوزیشن دے درمیان کدے مستقل ڈیڈلاک نہیں ہوندا۔ اتھے اپوزیشن وچ بیٹھن نوں گناہ نہیں سمجھیا جاندا۔ خیبر پختونخوا دی حکومت دے خاتمے توں بعد خود اپوزیشن لیڈر دے سیاسی کردار بارے پی ٹی آئی دے ارکانِ اسمبلی دے تحفظات وی ریکارڈ دا حصہ نیں۔ حالات توں واقف لوک ہن وی مذاکرات لئی لچک دکھاؤن دے عمل نوں دباؤ دا نتیجہ قرار دیندے نظر آ رہے نیں، پر سیاسی امور دے ماہرین دا اصرار اے کہ جمہوری نظام دی بقا دا دارومدار حکومت تے اپوزیشن دے درمیان سنجیدہ مذاکراتی عمل اُتے ای اے۔
اپوزیشن وچ ایس حوالے نال پیدا ہون والی تحریک دا مقصد اپنے سیاسی کردار دی ادائیگی دے نال نال سینکڑیاں دی تعداد وچ گرفتار تے نظر بند رہنمواں تے کارکنوں دی رہائی دا عمل وی اے۔ ہن پیدا ہون والی نئی صورتحال وچ حکومت زیادہ پُراعتماد، جدکہ اپوزیشن دفاعی محاذ اُتے کھڑی دکھائی دیندی اے۔
حکومت نوں سمجھنا چاہیدا اے کہ اپوزیشن نال مذاکرات دی میز اُتے بیٹھنا کمزوری نہیں، بلکہ قومی ذمہ داری دا احساس اے۔ ساریاں سیاسی جماعتاں تے حکومتاں وچ انتہا پسندانہ مؤقف رکھن والے رہنما ضرور ہوندے نیں، پر ایسے لوکاں دی موجودگی وچ کسے پوری جماعت نوں دہشت گرد قرار دینا انتہائی حماقت اے۔
ہن ایہو وقت اے کہ اپوزیشن وی اپنے طرزِ عمل وچ تبدیلی لیاوے تے جمہوری سوچ دا مظاہرہ کرے۔ حکومت دی وی ذمہ داری اے کہ سیاسی اختلافات نوں انتظامی اقدامات دے ذریعے حل کرن دی بجائے سیاسی راستہ اختیار کرے۔
اپوزیشن لیڈر دی وزیراعظم نال ملاقات تے مشاورت دا عمل بعض آئینی تقرریاں دے حوالے نال وی اتفاقِ رائے نال اگے ودھنا چاہیدا اے، کیوں جو ایہ تقرریاں سیاسی بنیاداں دی بجائے ریاستی مفاد نال جڑیاں ہوندیاں نیں۔ جے اپوزیشن لیڈر تقرریاں دے ایس عمل نوں وی ’’اڈیالہ جیل‘‘ دی منظوری نال مشروط کرن گے تاں معاملات اگے نہیں ودھ سکنگے۔
ہن اپوزیشن لیڈر نوں بامقصد مذاکرات لئی جے یو آئی دے سربراہ مولانا فضل الرحمان نوں وی اعتماد وچ لینا پئے گا، کیوں جو عملی طور اُتے اوہ اپوزیشن لیڈر دا کردار سنبھالے نظر آ رہے نیں۔
