پاکستان نوں مشرقی تے مغربی سرحداں اُتے سکیورٹی چیلنجز دا سامنا اے: ملک احمد

خطے وچ پائیدار امن لئی سفارتی کوششاں تے مذاکرات ناگزیر: قصور وچ خطاب

لاہور (سیاسی نمائندہ) سپیکر پنجاب اسمبلی ملک محمد احمد خاں نے آکھیا اے کہ پاکستان تے خطے وچ پائیدار امن قائم کرن لئی سفارتی کوششاں تے مذاکرات ناگزیر نیں۔ خطے نوں درپیش سکیورٹی چیلنجز، سرحدی کشیدگی تے دہشت گردی دے تناظر وچ قومی سلامتی تے علاقائی استحکام نوں ترجیح دینا ضروری اے۔

مکہ مکرمہ تے مدینہ منورہ سمیت مقدس مقامات دی حفاظت پوری امتِ مسلمہ دی سانجھی خواہش اے۔

ڈسٹرکٹ بار ایسوسی ایشن قصور دے انڈیپنڈنٹ گروپ آف لائرز دے جنرل ہاؤس اجلاس نوں خطاب کردیاں سپیکر نے آکھیا کہ پاکستان نوں مشرقی تے مغربی سرحداں اُتے سکیورٹی چیلنجز دا سامنا اے، جدکہ دہشت گردی دے خلاف جنگ وچ پاک فوج، پولیس تے قانون نافذ کرن والے اداریاں دے اہلکاراں سمیت عام شہریاں نے وی قربانیاں دتیاں نیں۔

قصور موٹروے منصوبے نوں علاقے لئی اہم پیش رفت قرار دیندیاں انہاں آکھیا کہ ایس منصوبے نال مقامی معیشت، زرعی سرگرمیاں تے عوامی رابطیاں نوں فروغ ملن دی توقع اے۔

قصور بار دے مسئلے دا ذکر کردیاں سپیکر نے آکھیا کہ وکلا نوں باوقار تے معیاری کم کرن دی جگہ، جدید قانون لائبریری، پکے رستیاں تے مناسب پارکنگ سمیت بنیادی سہولتاں فراہم کرنا ضروری اے۔

دریں اثنا، سپیکر نے مقامی طرزِ حکمرانی وچ اصلاحات بارے بی سی پی آر ٹاسک فورس دی رپورٹ دی تقریبِ رونمائی وچ بطور مہمانِ خصوصی شرکت کیتی۔

ایس موقع اُتے سپیکر نے آکھیا کہ مقامی حکومتاں نوں آئینی تحفظ دینا ناگزیر اے تے اختیارات نچلی سطح تک منتقل کرنے پین گے۔

سپیکر نے مقامی طرزِ حکمرانی نال متعلق اہم معاملے قومی مکالمے دا حصہ بناؤن اُتے بی این یو سینٹر فار پالیسی ریسرچ دیاں کوششاں نوں قابلِ تحسین قرار دیندیاں آکھیا کہ مقامی حکومتاں بارے اصلاحاتی رپورٹ دیاں سفارشات نظام نوں مؤثر بناؤن تے اختیارات دی حقیقی منتقلی وچ مددگار ثابت ہون گیاں۔