اینٹی کرپشن وچ ڈیپوٹیشن اُتے تعیناتیاں بند ہونیاں چاہیدیاں نیں: چیف جسٹس
جعلی رجسٹریاں دے مقدمے وچ رجسٹری محرر تے رجسٹرار دیاں عبوری ضمانتاں مسترد، عدالت دی ڈی جی اینٹی کرپشن نوں نویں رولز وچ ترمیم دیاں تجاویز اُتے غور دی ہدایت
لاہور (کورٹ رپورٹر) چیف جسٹس لاہور ہائیکورٹ جسٹس عالیہ نیلم نے اینٹی کرپشن وچ 40 فیصد افسران دی ڈیپوٹیشن اُتے تعیناتی اُتے تشویش دا اظہار کردیاں قرار دتا اے کہ اینٹی کرپشن وچ ڈیپوٹیشن دا سلسلہ بند ہونا چاہیدا اے، فیر ای محکمہ ٹھیک ہووے گا۔
عدالت نے چھ جعلی رجسٹریاں دے مقدمے وچ رجسٹری محرر تاج محمد تے رجسٹرار محبوب علی دیاں عبوری ضمانتاں مسترد کر دتیاں۔
سماعت دوران چیف جسٹس عالیہ نیلم نے ریمارکس دتے کہ ریکارڈ ویکھن نال جعلسازی نظر آندی اے تے ایہہ ملی بھگت نال ہوئی اے۔ اک غلط رجسٹری نال جائیداد دی مالیت کتھوں کتھے پہنچ جاندی اے۔ رجسٹریاں دے انبار لگے ہوئے نیں، لوک خوار ہو رہے نیں، پر متعلقہ حکام دے کان اُتے جوں وی نہیں رینگدی۔
عدالتی حکم اُتے ڈی جی اینٹی کرپشن سہیل ظفر چٹھہ عدالت وچ پیش ہوئے تے دَسیا کہ نویں رولز تیار کرکے چیف سیکرٹری پنجاب نوں بھجوا دتے گئے نیں۔
چیف جسٹس عالیہ نیلم نے پچھیا کہ اینٹی کرپشن وچ سپیشل پراسیکیوٹرز دی تعیناتی لئی کیہڑے اقدامات کیتے گئے نیں؟ ڈی جی اینٹی کرپشن نے دَسیا کہ پراسیکیوشن لئی فوجداری وکیلاں دیاں خدمات حاصل کیتیاں جان گیاں۔
ایس اُتے چیف جسٹس نے ریمارکس دتے کہ ڈیپوٹیشن اُتے آؤن والے افسر کیس خراب کر دیندے نیں۔ پراسیکیوشن وچ بھرتیاں لئی باقاعدہ اشتہار جاری ہونا چاہیدا اے۔ عدالت نے ڈی جی اینٹی کرپشن نوں نویں رولز وچ ترمیم بارے تجاویز اُتے دوبارہ غور کرن دی ہدایت کر دتی۔
