آن لائن فراڈ: ہزاراں مشکوک لنکس تے موبائل نمبر بلاک

آن لائن فراڈ: ہزاراں مشکوک لنکس، موبائل نمبر تے ڈیوائسز بلاک

اسلام آباد (مانیٹرنگ ڈیسک) پاکستان ٹیلی کمیونیکیشن اتھارٹی (پی ٹی اے) نے آن لائن فراڈ، جعلی ویب سائٹس تے سوشل میڈیا دے ذریعے دھوکہ دہی دے خلاف کارروائی کردیاں ہزاراں مشکوک لنکس، موبائل نمبرز تے ڈیوائسز بلاک کر دِتیاں۔

سینیٹ دی فنکشنل کمیٹی برائے انسانی حقوق وچ پیش کیتیاں دستاویزات دے مطابق الیکٹرانک فراڈ نال متعلق 15 ہزار 706 توں ودھ مشکوک لنکس دی جانچ پڑتال کیتی گئی، جنہاں وچوں 15 ہزار 39، یعنی 95.75 فیصد لنکس بلاک کر دِتے گئے۔

ایناں وچ ویب سائٹس، ایپس، فیس بُک، انسٹاگرام، ایکس تے ٹک ٹاک دے لنکس شامل سن۔

دستاویزات دے مطابق ستمبر 2023 توں ستمبر 2026 تک فراڈ وچ مبینہ استعمال دے باعث 6 ہزار 818 موبائل نمبرز، 5 ہزار 925 ڈیوائسز تے 174 قومی شناختی کارڈ بلاک کیتے گئے، جدکہ 6 ہزار 818 کیسز وفاقی تحقیقاتی ادارے (ایف آئی اے) تے نیشنل سائبر کرائم انویسٹی گیشن ایجنسی نوں بھجوا دِتے گئے۔