ایل پی جی دی بلاتعطل فراہمی لئی حکومت سکیورٹی فراہم کرے: امپورٹرز
لاہور (مانیٹرنگ ڈیسک) ایل پی جی دی بلاتعطل فراہمی یقینی بناؤن تے سنگین بحران توں بچن لئی ایل پی جی امپورٹرز نے حکومت کولوں سکیورٹی منگ لئی اے۔
ایس حوالے نال چیئرمین ایل پی جی امپورٹرز ایسوسی ایشن شیخ مکرم وحید نے سیکرٹری وزارتِ پٹرولیم تے ڈی جی نیشنل لاجسٹک کارپوریشن راولپنڈی نوں خط لکھ کے ہنگامی مدد دی اپیل کیتی اے۔ خط وچ آکھیا گیا اے کہ ایران نال ملدے تین بارڈر بند نیں، جدکہ سکیورٹی دے ناقص انتظامات دی وجہ توں ایل پی جی دے باؤزرز دی آمدورفت وچ مشکلات دا سامنا کرنا پے رہیا اے۔
ایل پی جی امپورٹرز ایسوسی ایشن نے ایہ خط وزیراعظم سیکرٹریٹ، چیف کلکٹر کسٹمز، کلکٹر کسٹمز کوئٹہ، گوادر تے چیئرمین اوگرا نوں وی بھیج دِتا اے۔
بھیجے گئے خط وچ مزید آکھیا گیا اے کہ ایران نال ملدے تین وڈے بارڈر، گبد، مند تے چاغی/ماشخیل، تجارتی آمدورفت لئی بند نیں۔ ایس ویلے صرف تفتان بارڈر کھلا اے، جدکہ بلوچستان وچ امن و امان دی خراب صورتحال دی وجہ توں تفتان توں پنجاب تک گاڑیاں دی آمدورفت بری طرح متاثر ہو رہی اے۔
ایل پی جی لے کے آؤن والیاں جیہڑیاں گاڑیاں پہلے 3 توں 4 دناں وچ پنجاب پہنچ جاندیاں سن، ہُن اوہناں نوں 10 دناں توں وی ودھ وقت لگ رہیا اے۔ ڈرائیوراں تے گاڑیاں نوں وی سنگین خطرات دا سامنا اے۔
لہٰذا حکومت کولوں مطالبہ کیتا گیا اے کہ تفتان توں پنجاب تک نیشنل لاجسٹک کارپوریشن (این ایل سی) دی طرفوں محفوظ قافلے دے نال سکیورٹی ایسکارٹ فراہم کیتی جاوے۔ ایس اقدام نال پنجاب وچ ایل پی جی دی بلاتعطل فراہمی، صارفین لئی قیمتاں دا استحکام تے انسانی جاناں دی حفاظت یقینی بنائی جا سکے گی۔
