ملکی ترقی دا راز اے آئی تے ڈیجیٹلائزیشن وچ اے: وزیراعظم

علی بابا دا زرعی اجناس نوں چینی منڈیاں وچ برآمد کرن لئی تعاون خوش آئند اے: وزیراعظم

اسلام آباد (نامہ نگار) وزیراعظم محمد شہباز شریف نے آکھیا اے کہ ڈیجیٹلائزیشن مصنوعی ذہانت تے جدید ٹیکنالوجی دا مؤثر استعمال پاکستان وچ تجارت برآمدات زرعی پیداوار کاروباری سہولتاں تے سرکاری خدمتاں دے معیار نوں بہتر بناؤن وچ اہم کردار ادا کر سکدا اے۔ علی بابا گروپ دا پاکستان دیاں زرعی اجناس نوں چینی منڈیاں وچ برآمد کرن لئی تعاون خوش آئند اے۔

ایہہ گلّاں اوہناں معیشت تے گورننس وچ مصنوعی ذہانت ڈیجیٹلائزیشن تے علی بابا نال تعاون دی پیش رفت دا جائزہ لین لئی اجلاس دی صدارت کردیاں آکھیاں۔ وزیراعظم نے آکھیا کہ ملکی ترقی لئی زرعی شعبے نوں جدید طریقیاں اُتے استوار کرنا ضروری اے۔ علی بابا گروپ دے تعاون نال کینسر دی پیشگی تشخیص دے نظام دا نفاذ وی جلد یقینی بنایا جاوے۔

اوہناں ہدایت دِتی کہ اوگرا علی بابا گروپ دے تعاون نال پٹرولیم مصنوعات دی سپلائی چین دی نگرانی دا نظام جلد نافذ کرے، جدکہ ایکسپورٹ پروموشن بورڈ ملکی برآمدات ودھاؤن لئی تعاون یقینی بنائے۔

وزیراعظم نے آکھیا کہ ملکی ترقی دا راز اے آئی تے ڈیجیٹلائزیشن وچ اے۔ سارے منصوبیاں نوں واضح اہداف مقررہ مدت تے مؤثر نگرانی دے نال اگے ودھایا جاوے۔

دوجے پاسے اسلام آباد دے سکولاں وچ اصلاحات بارے اجلاس دی صدارت کردیاں وزیراعظم نے آکھیا کہ وفاقی دارالحکومت دے سرکاری سکولاں دے مسائل حل کرن لئی سارے وسائل فوری طور اُتے ورتے جان۔ استاد تعلیم تے تدریس توں علاوہ کسے ہور سرگرمی وچ حصہ نہیں لین گے۔

اوہناں سکولاں دے بنیادی ڈھانچے دے سارے مسائل ہنگامی بنیاداں اُتے حل کرن، طلبہ لئی مفت لنچ دا نظام فعال بناؤن تے وفاقی وزیر منصوبہ بندی احسن اقبال نوں اک ہفتے اندر مسائل حل کرن دی ہدایت دِتی۔

وزیراعظم نے سارے سکولاں وچ سمارٹ بورڈ جلد نصب کرن تے جسمانی معذوری دا شکار طلبہ لئی ریمپ بناؤن دی ہدایت وی دِتی۔

اس توں علاوہ وزیراعظم نال وزیر ریلوے حنیف عباسی تے وفاقی وزیر ہاؤسنگ اینڈ ورکس ریاض حسین پیرزادہ نے وکھ وکھ ملاقاتاں کیتیاں۔ ملاقاتاں دوران وزارت ریلوے دے انتظامی مالیاتی تے اصلاحاتی معاملات، جدکہ وزارت ہاؤسنگ اینڈ ورکس دے امور تے ترقیاتی منصوبیاں بارے گل بات ہوئی۔