فرانس دے سفیر دی ایم ڈی نیشنل گرڈ نال ملاقات، سرمایہ کاری بارے گل بات

فرانس دے سفیر دی ایم ڈی نیشنل گرڈ نال ملاقات، بجلی دے شعبے وچ سرمایہ کاری بارے گل بات

لاہور (اپنے کامرس رپورٹر توں) پاکستان وچ فرانس دے سفیر ژاں نوئل پواریر (Jean-Noël Poirier) دی سربراہی وچ پنج رکنی وفد نے نیشنل گرڈ پاکستان دے مینیجنگ ڈائریکٹر انجینئر الطاف حسین ملک نال واپڈا ہاؤس لاہور وچ ملاقات کیتی۔

ملاقات دوران پاکستان دے بجلی ترسیل دے نظام وچ غیر ملکی سرمایہ کاری، قابلِ تجدید توانائی نوں قومی نظام نال جوڑن، بیٹری انرجی سٹوریج سسٹم تے ادارے دی ترقی دے مختلف معاملےآں اُتے تبادلہ خیال کیتا گیا۔

ایس موقعے اُتے پاکستان دے پاور سیکٹر نوں درپیش چیلنجز، بجلی ترسیل دے نظام وچ سرمایہ کاری تے متعلقہ آلات دی مقامی سطح اُتے تیاری دے امکانات بارے وی گل بات ہوئی۔

فرانسیسی سفیر نے آکھیا کہ فرانس دیاں کمپنیاں پاکستان دے بجلی ترسیل دے بنیادی ڈھانچے وچ سرمایہ کاری کرن وچ دلچسپی رکھدیاں نیں۔

ایم ڈی نیشنل گرڈ پاکستان انجینئر الطاف حسین ملک نے آکھیا کہ ملک وچ بجلی پیدا کرن دی وڈی صلاحیت موجود اے، جدکہ قابلِ تجدید توانائی نوں قومی نظام وچ شامل کرن لئی بجلی ترسیل دے نیٹ ورک نوں ہور بہتر بنایا جا ریا اے۔

انجینئر الطاف حسین ملک نے خواتین نوں بااختیار بناؤن، صنفی مساوات، ملازماں دی حفاظت تے بھلائی لئی ادارے ولوں کیتے گئے اقدامات بارے وی دَسیا۔ اوہناں ’’آواز‘‘ فورم نوں خواتین ملازماں دے مسائل حل کرن تے انہاں نوں برابر دے مواقع فراہم کرن لئی اک اہم اقدام قرار دِتا۔

فرانسیسی سفیر نے نیشنل گرڈ پاکستان دیاں انہاں کوششاں نوں سراہندے ہوئے آکھیا کہ اوہ پاکستانی ادارے نال طویل مدتی شراکت داری قائم کرن لئی پُراعتماد نیں۔