پنجاب اسمبلی وچ آٹے دیاں قیمتاں، پالیسی تے ترقیاتی فنڈز اُتے بحث
حکومت نوں عوامی مسئلیاں دی پرواہ نہیں: معین ریاض، فراڈ دیاں شکایتاں اُتے 90 نجی منڈیاں دے لائسنس منسوخ کر دِتے: سلمیٰ بٹ، اویس دریشک دا گنے دی کرشنگ شروع کرن دا مطالبہ، اقبال خٹک دا فنڈز نہ ملن اُتے شکوہ، 5 آرڈیننس پیش، اک ترمیمی بل منظور
لاہور (سیاسی نمائندہ) پنجاب اسمبلی دے اجلاس وچ آٹے تے کڻک دیاں قیمتاں، کساناں دے مسائل، گنے دی کرشنگ، نجی منڈیاں وچ مبینہ فراڈ تے ترقیاتی فنڈز دی ونڈ بارے بحث ہوئی، جدکہ پوسٹ بجٹ عام بحث وی شروع کر دِتی گئی۔
وزیر خزانہ مجتبیٰ شجاع الرحمان نے دَسیا کہ مالی سال 2025-26 دی پہلی سہ ماہی دوران 833 ارب روپے خرچ کیتے گئے۔ وزیر خوراک سلمیٰ بٹ نے آکھیا کہ حکومت کول اگلے پنج مہینیاں لئی 10 لاکھ میٹرک ٹن توں ودھ کڻک موجود اے، جدکہ فراڈ دیاں شکایتاں ملن اُتے 90 نجی منڈیاں دے لائسنس منسوخ کر دِتے گئے نیں۔
پنجاب اسمبلی دا اجلاس ڈپٹی سپیکر ملک ظہیر اقبال چنڑ دی صدارت وچ اک گھنٹہ 56 منٹ دی تاخیر نال شروع ہویا۔
اپوزیشن لیڈر معین ریاض قریشی نے حکومتی ارکان تے وزیراں دی غیر موجودگی اُتے اعتراض کردیاں آکھیا کہ آٹا مہنگا ہو چکیا اے، پر حکومت نوں عوامی مسئلیاں دی کوئی پرواہ نہیں۔ اوہناں چیف وہپ رانا محمد ارشد توں مطالبہ کیتا کہ حکومتی ارکان دی کورم لئی مطلوبہ گنتی پوری کرائی جاوے۔ ڈپٹی سپیکر نے وی اجلاس وچ حکومتی ارکان دی موجودگی ضروری قرار دِتی۔
وقفۂ سوالات دوران اپوزیشن رکن سردار اویس دریشک نے آکھیا کہ کسان بدحالی دا شکار نیں، ایس لئی گنے دی کرشنگ فوری شروع کرائی جاوے، تاں جو کڻک دی اگلی فصل دی تیاری لئی مناسب وقت مل سکے۔ اوہناں خبردار کیتا کہ جے کرشنگ وچ دیر ہوئی تے کڻک دا بحران دوبارہ پیدا ہو سکدا اے۔
اپوزیشن رکن اعجاز شفیع نے آکھیا کہ آٹے دی قیمت 190 روپے فی کلو توں ودھ چکی اے، جدکہ کڻک دی قیمت 5500 روپے فی من تک پہنچ گئی اے۔
وزیر خوراک سلمیٰ بٹ نے آکھیا کہ حکومت نے ایس واری اپنے طور اُتے کڻک دے ذخیرے جمع نہیں کیتے، البتہ پہلے توں موجود کڻک دستیاب اے۔ گنے دی کرشنگ جلد شروع کراؤن لئی کم جاری اے۔
اجلاس وچ پنج آرڈیننس پیش کیتے گئے، جدکہ قرآن پاک دی طباعت تے ریکارڈنگ نال متعلق ترمیمی بل تے ڈرامائی تے تھیٹر پرفارمنسز بل پیش کیتے گئے۔ سوسائٹی رجسٹریشن ترمیمی بل کثرتِ رائے نال منظور کر لیا گیا۔
پوسٹ بجٹ بحث دوران وزیر خزانہ نے دَسیا کہ مالی سال دی پہلی سہ ماہی دے 833 ارب روپے دے اخراجات وچ 589 ارب روپے غیر ترقیاتی مد وچ خرچ ہوئے۔ تنخواہواں اُتے 152 ارب روپے، پنشن اُتے 117 ارب روپے تے مقامی حکومتاں اُتے 16 ارب روپے خرچ کیتے گئے، جدکہ سبسڈی دی مد وچ 9 ارب روپے توں ودھ خرچ ہوئے۔
بعد وچ ایجنڈا مکمل ہون اُتے اسمبلی دا اجلاس جمعے دی دوپہر 2 وجے تک ملتوی کر دِتا گیا۔
